“Айғақ” телеарнасының түсірілім тобы Алтайдың асқақ шыңына кезекті іссапарға аттанды.
Түркістан облыстық мәслихатының депутаты Дулат Әбіш бастаған қоғамдық делегация “Тәуелсіздік бәрінен қымбат: Оңтүстіктен өр Алтайға” тақырыбымен тарихи туризм мен қазіргі туризмді бірге жандандырып жатқан Шығыс Қазақстан облысының Қатон-Қарағай ауданына бара жатыр. 27-мамырда түс ауа шыққан бір топ азаматтар бүгін Өскемен қаласына жетті.
Тасын түртсең тұнып тұрған тарихы бар Қазақстанның оңтүстік-шығыс аймағын автожолмен жүруді жөн көрген делегация сапарды Түлкібас ауданындағы мемлекет қайраткері Тұрар Рысқұловтың ескерткішінен бастады.
Алаш қайраткерінің рухына тағзым жасап, Айша бибі, Қарахан кесенесімен келушілерді мыңжылдық тарихымен қызықтырған Тараз қаласына тоқтады. Онда жергілікті әріптестер Жарылқасын Нұралиев пен Оралхан Дәуіт күтіп алып, құрмет көрсетті.
Делегация мүшелеріне жаңа қала — Қонаев қаласын көрудің де сәті түсті. Кіреберіс тұстағы мемлекетіміздің заңғар тұлғасының есімі берілген қаланың шырайы кіріп қалғандай.
Табиғатымен, тарихымен, мәдениетімен тамсандырған Алматы, жаңа Жетісу облысынан өткен қоғамдық делегация Қапал, Алакөл, Сарқан ауданындағы батырлардың басына аялдап, Үржар ауданына кіре берістен кесенесі тұрғызылып жатқан халық жазушысы Қабдеш Жұмаділовтің рухына Құран бағыштады.
Тау баурайынан сарқырап ағып жатқан Лепсі өзенінің тамашасын сипаттауға сөз жетпейді.
Төрт облыстың шекарасынан өткен делегация құрамында: Түркістан облыстық мәслихатының депутаты, «Айғақ» телеарнасының басшысы Дулат Әбіш, Ш.Уәлиханов атындағы тарих және этнология институтының бас ғылыми қызметкері, тарих ғылымдарының докторы, профессор Ахмет Тоқтабай, Жезқазғандық өлкетанушы Айткамал Қожырбаев, Түркістан облыстық қоғамдық кеңесінің мүшесі Бегалы Рысбеков, Шымкент қаласының тұрғыны — Сабыр Ташимбетов, Наби Хопабаев және телеарнаның журналист-операторлары бар.
Оңтүстік-шығыс бағытын бағдарға алған делегация кешқұрым Өскемен қаласына жетті.
Арайлым ӘБСАҒАТ
aigak.kz тілшісі