Былтыр карантинмен қатарласып, көктемнің мамыражай күнінде Түркістан облысы Мақтаарал ауданы техногендік апатқа ұшырады. Яғни, Жеңіс, Жаңатұрмыс, Фирдоуси, Өргебас елдімекендерін су басты. Салдарынан сол аймақтағы халық қиын жағдайда қалып, шығынға ұшырады. «Жұмыла көтерген жүк жеңіл» демекші, төтенше жағдай кезінде шарасыз жағдайдағы халыққа жергілікті билік өкілдері, полицейлер мен құтқарушылар барынша көмек көрсетіп, зардап шеккендердің қалыпты өмірге келіп, үйлеріне оралуына жағдай жасады. Сол көптің ішінде көмекке келгендердің бірі – «Beeline Қазақстан» . Аталмыш компания Мақтааралдағы үй құрылысына 850 миллион теңгеден аса қаражат бөліп, «Birgemiz» және «Түркістан» қорларына кезекті үлесін қосты. Телекоммуникациялық компания өкілдері мақтааралдық тұрғындардың қайғысын естіген сәттен-ақ әрекетке көштік дейді. Елге түскен нәубеттен тыс қала алмаған байланыс операторы баспана тұрғызуға бірден атсалысқандарын айтады.
АНАР ЖҰМАҒҰЛОВА, «Beeline Қазақстан» компаниясының әлеуметтік жобалар менеджері: «Апатты аймақта көптеген үй тұруға жарамай қалғандықтан, баспанаға мұқтаж жандарға алдымен 312 миллион теңгеге 20 үй салып бердік. Кейіннен тағы 30үйдің құрылысына 510 миллион теңге аударылды. Сонымен қатар, 4500-ден астам тұрғынға бірден тегін байланыс пен интернет түрінде қолдау көрсеттік».
Салынған жаңа баспаналарға мониторинг жүргізу барысында «Beeline Қазақстан» компаниясының өкілдері тұрғындардың жағдайын біліп қайтты. Бүгінде ауданының орталығында тұрғызылған біркелкі үйлерге тұрғындар жайғаса бастапты. Іші жылы, жайлы қоныс деп отыр тұрғындар.
РЫСКҮЛ АСҚАРҚЫЗЫ, Мақтаарал ауданының тұрғыны: «Бір түнде су басқан бізге ел болып көмек берген халыққа және « Beeline Қазақстан» компаниясы да алғысым шексіз. Балаларымыз бен немерелеріміз де риза. Адам басына мұндай қиындықты салмасын деп тілеймін».
ЗОРБАЕВТАР ӘУЛЕТІ, Мақтаарал ауданының тұрғыны: «Барлығына бірдей жағдай жасалған, үйдің іші заманауи үлгіде. Қуаныштымыз. Үйсіз-күйсіз қалғандарға қолдау білдірген азаматтарға ризамын».
Қазіргі таңда жаңа кейіпке енген Мақтааралда жаңалық көп. Мырзакент елді мекеніндегі жаңа шағынауданда 1200 орынды мектеп салынды. Білім ордасы ел Тәуелсіздігінің 30 жылдығына орай ел игілігіне беріледі деп күтілуде.
Ел-жұрттың амандығын көрген компания өкілдері мұндағы жақсы өзгерістерге қанықты.
