ЮНЕСКО Бас конференциясының 41-ші сессиясы шеңберінде Қазақстанның Франциядағы Елшісі, ЮНЕСКО жанындағы Тұрақты өкілі Жан Ғалиев Білім, ғылым және мәдениет жөніндегі Біріккен Ұлттар Ұйымының 75 жылдығына арналған арнайы рәсімде сөз сөйледі, деп хабарлайды ҚР Сыртқы істер министрлігінің баспасөз қызметі.
Іс-шараға әлемнің 24 елінің мемлекет және үкімет басшылары, сыртқы істер, білім және мәдениет министрлері, сондай-ақ мүше мемлекеттердің елшілері мен тұрақты өкілдері қатысты.
Мәртебелі жиынға арнаған сөзінде Елші Қазақстан Республикасы тәуелсіздігінің 30 жылдығын атап өту жылында өтіп жатқан іс-шараның ерекше мәні бар екенін атап өтіп, еліміздің тұрақты және прогрессивті мемлекет құрудағы негізгі жетістіктерін атап өтіп, әріптестік рухында ЮНЕСКО шеңберіндегі сындарлы ынтымақтастықтың одан әрі қарышты дамуына үміт білдірді.
Сонымен қатар, ол ЮНЕСКО-ның Бас директоры ретінде жаңа мерзімге сайлануына байланысты Одрэ Азулені құттықтай отырып, Қазақстан басшылығының осы беделді халықаралық ұйым мен оның негізгі органдарының дәйекті жұмысына қолдау көрсететінін мәлімдеді.
Тұрақты өкіл ЮНЕСКО басшылығын 2022 жылғы қыркүйекте Нұр-Сұлтан қаласында өтетін Әлемдік және дәстүрлі діндер лидерлерінің VII съезіне шақырды.
Қазақстанның ЮНЕСКО-ның халықаралық тізіліміне мәдени және табиғи мұраның әртүрлі нысандарын енгізу жөніндегі белсенді қызметін атай отырып, Елші Қазақстан Үкіметінің ЮНЕСКО-ның конвенциялық құжаттарына сәйкес өз аумағында Дүниежүзілік мұра ескерткіштеріне кешенді қорғауды қамтамасыз ету бойынша тұрақты жұмыс атқаруға нық ниетін растады.
Ж. Ғалиев Қазақстанның бастамаларын қолдағаны үшін ЮНЕСКО-ға мүше мемлекеттерге алғысын білдіріп, Дүниежүзілік мұра комитетіне еліміздің 2023-2027 жылдарға арналғанкэ кандидатурасын қолдауға шақырды.
Анықтама: 1945 жылғы 16 қарашада Лондонда 44 мемлекет өкілдерінің қатысуымен өткен БҰҰ конференциясында Білім, ғылым және мәдениет мәселелері жөніндегі Біріккен Ұлттар Ұйымын (ЮНЕСКО) құру туралы шешім қабылданды. 1992 жылы 22 мамырда Қазақстан ЮНЕСКО-ға толық құқылы мүшесі болып қосылды.
