Сербияның Белград қаласында аяқталған кезекті бокстан әлем чемпионатында Қазақстан ұлттық құрама командасы тарихи жеңіске жетті. Құрама жігіттері шаршы алаңда мықтылықтарын көрсетіп, дүние жүзі бойынша азулы команда екендіктерін тағы да бір рет дәлелдеп , туған елге оралды.
Бокстан Қазақстан ұлттық құрама командасының намысын қорғаған түркістандық талантты боксшы, әлем чемпионы Сакен Бибосынов пен жеке бапкері, еліміздің ұлттық құрама жігіттерін баптайтын білікті бапкер Мырзағали Айтжановты бүкіл халық болып, әуежайдан ыстық ықыластарымен қарсы алды. Елдің қуанышына бөленген батыр ұлдарымыздың да көңіл-күйлері жоғары болып, туған елге табан тіреді.
Бокстан әлемнің ең азулы деген былғары қолғап шеберлері қатысқан биылғы әлем чемпионаты аса тартысты өтті. Бүкіл дүние жүзінің спорт сүйер қуаымы назар аударған бокс додасында еліміздің намысын қорғаған түркістандық 51 келі салмақтағы жерлесіміз Сәкен Бибосынов финалда америкалық Роско Хиллді айқын басымдылықпен жеңді.
Сакен үшін биылғы жыл табысты жыл болды. Токио олимпиадасында қола жүлдегер атанған ол әлем чемпионатының айқас алаңында өзінің талантын әлемге паш етті. Белградтағы жекпе-жектің шешуші айқасында жерлесіміз Сакен Бибосынов америкалық боксшы Роско Хиллге бір де бір мүмкіндік бермеді. Қарсыласын тізе бүктіріп, алтын медалді қанжығасына байлады. Бұл Қазақстанның еңбек сіңірген жаттықтырушысы, жеке бапкері Мырзағали Айтжановтың қажырлы еңбегінің нәтижесі.
