ҚАЛА ӘКІМІ МЕКТЕП БІТІРУШІ ТҮЛЕКТЕРГЕ АҚ ЖОЛ ТІЛЕДІ

Бүгін қала әкімі Рашид Аюпов А. Байтұрсынов атындағы №1 мектеп-лицейінде өткен Соңғы қоңырау мерекесіне қатысты.

 Шаhар басшысы: «Құрметті түлектер, бүгін сіздер үлкен өмірге қадам басқалы отырсыздар. Мектепті аяқтап, мамандық таңдап, жоғары оқу орнына түсіп, алған білімдеріңіз арқылы еліміздің абыройын арттыру Сіздердің қолдарыңызда. Міне, көз алдарыңызда өзгерген Түркістан қаласында Сіздердің болашақтарыңыз үшін жасалған жоспарлар жүзеге асырылып келеді. Сіздердің терең білім алуларыңыз үшін ұстаздар еңбек етті. Ендігі, мамандықты дұрыс таңдап, сол мамандықтың нағыз шебері болуға тырысуларыңыз қажет. Өйткені, мамандық таңдау — маңызды іс. Жолдарыңыз сәтті болсын! Ақ жол!», — деген тілегін білдіріп, мұғалімдерге де алғысын айтты.

Жалпы, Түркістан қаласында 2046 түлек бүгін оқу ордасын тәмамдап, жаңа өмірге қадам басты. Олардың ішінде 1337 мектеп бітіруші Ұлттық бірыңғай тестілеуде бағын сынамақ. Оның 124-і «Алтын белгіге», 59-ы «Үздік аттестатқа» үміткер.