Ұлы Отан соғысындағы жеңістің 76 жылдығына орай Арыс қаласының әкімі Гүлжан Құрманбекова соғыс ардагерлерінің шаңырақтарына арнайы барып майдангер қарттарға 1 млн теңгенің сыйақысын табыс етті. Айта кету керек Арыс қаласы бойынша бүгінгі таңда ҰОС-на қатысқан екі ардагер бар. Солардың бірі Қасымбек Кенжебеков ақсақал. Ол 1942 жылы 20 жасында Арыс өңірінен қан майданға аттанып туған жерге 1948 жылы оралды.
Соғыстан кейін еңбекке араласып отбасында 11 ұл-қыз тәрбиелеп өсірген ардагер бүгінде 28 немере 30 шөбере сүйіп отырған ардақты жан. Осы орайда қала әкімі Гүлжан Мамытқызы Ұлы Жеңісті жақындатуға үлес қосқан майдангерге облыс әкімі Өмірзақ Шөкеевтің құттықтау хатын тапсырды. Жалпы облыстан Ұлы Отан соғысына 140 мыңнан астам азамат аттанып оның ішінде 51-і Кеңес Одағының батырлары, біреуі Халық қаһарманы және 8 майдангер үшінші дәрежелі «Даңқ» ордені кавалерлері атағын алған.
Сонымен бірге бұл күні Арыс қаласының әкімі «Жеңіс скверіне» гүл шоқтарын қойды. Ұлы жеңістің 76 жылдығына арналған шара барысында майданда ерлікпен қаза тапқан батырларды 1 минут үнсіздікпен еске алды.
