ТҮРКІТІЛДЕС ЕЛДЕРДЕГІ БАҚ ӨКІЛДЕРІНІҢ ҚАТЫСУЫМЕН ТУРИСТІК АҚПАРАТТЫҚ ТУР ӨТТІ

Ұлыстың ұлы күні – Наурыз мерекесі қарсаңында Түркістан облысы Отырар ауданында Отырар өңірінің тарихын насихаттау және туризмінің тартымдылығын арттыру мақсатында Түркітілдес елдердің БАҚ өкілдерінің қатысуымен туристік ақпараттық тур өтті. Шетелдік БАҚ өкілдері Арыстанбаб кесенесіне зиярат етіп, туристерге кешенді қызмет көрсететін Сапар орталығындағы Наурыз мерекесіне орай дайындалған ұлттық тағамдар мәзірінен дайындаған дастарханнан дәм татты.Ақпараттық тур мүшелері Отырар қорық музейінің аумағында орналасқан тарихи-мәдени мұраны қорғау, туризм саласына сай орталық жасау мақсатында салынған орталықтың экспозиция залымен танысып, Отырар қорық-музейінің директоры Жангелді Махашов пен ғылыми істері жөніндегі орынбасары Серік Ақылбектерден сұхбаттар алып, Отырар тарихынан тың мағлұматтар алды. Одан соң ат басын Отырар қалажұртына бұрып, әлемге әйгілі ортағасырлық Отырар қаласы туралы және ондағы қазба барысында аршылған нысандармен танысты. Шетелдік БАҚ өкілдерінің келесі бағыты Отырар қорық-музейінде  жалғасын тапты. Аудандық мәдениет бөлімінің қызметкерлері мен музей қызметкерлерінің бірлесе ұйымдастырған «Музей түні» іс-шарасын тамашалады. Іс-шара аясында театрландырған көріністері арқылы музей экспозициясы таныстырды.ҚР Тұңғыш Президенті — Елбасының Түркістан қаласын облыс орталығы ету жөніндегі тарихи шешімі біз үшін оң шешім болды. Түркі әлемінің алтын бесігіне айналып, рухани-мәдени астанасы болған қалаға келуші туристердің саны жылдан-жылға арта түсуде. Бұл біздің қазақ өркениетінің алтын діңгегі атанған Отырар жеріне де ықпалды болмақ. Өйткені, Отырар жеріне бұл күндері жер жүзінің  ғалымдары мен саяхатшыларының қызығушылығы артуда және Түркістанға келген туристер Отырарға да атбасын бұратындығы анық. Отырар аумағындағы тарихи-мәдени мұ­ра­­­лар арқылы танымдық саяхаттарды да­мы­­ту­ға мүмкіндік мол.