Түркістан: Әуежай бағытындағы 100 мың түп ағаш көшеттері әктелді

Түркістан қаласын көркейту, көгалдандыру мақсатында облыстық ауыл шаруашылығы басқармасының ұйымдастыруымен әуежай бағытындағы күре жол бойына санитарлық-тазалық жұмыстары жүргізілді. Көктем мезгілінде қолға алынған игі бастамаға басқармаға қарасты 21 мекеменің қызметкерлері қатысса, тазалық акциясына жалпы саны 1400-ге жуық азамат жұмылдырылған. Яғни әрбір аудан қалалардағы «Ветеринариялық қызмет» мемлекеттік коммуналдық кәсіпорындары мен басқарма теңгеріміндегі «Тұран су», «Бөген арнасы» мекемелерінің ұжымы да тазалық шарасының басы-қасынан табылды. Осы орайда әрбір мекеме ұжымы өздеріне бекітілген аумақтар бойынша жол жиектерін қоқыс қалдықтарынан тазартып, егілген ағаш көшеттерін әктеу жұмыстарын жүзеге асырды. Нәтижесінде Түркістан қаласындағы      Б. Саттарханов даңғылымен қиылысып жатқан әуежай бағытындағы 16 шақырымдық күре жолдың қос жағалауындағы 100 мың түпке жуық ағаш көшеттері әктеліп шықты. Айта кету керек тиісті жұмыстарға мекеме қызметкерлерінен өзге арнайы техникалар да жұмылдырылған. Ал тиісті жұмыстарды үйлестіруші Түркістан облыстық ауыл шаруашылығы басқармасы осындай ұжымдасқан тазалық шараларын осы айдың ішінде үш мәрте ұйымдастыру жоспарлап отыр. Бұл туралы басқарма басшысының орынбасары Нұржігіт Мырзахметов мәлім етті.

aigak.kz