Түркістан облысының медицина мамандары біліктілігін арттыру үшін Түркияға кетті, — деп хабарлайды Түркістан облысы әкімінің баспасөз қызметі. 5 дәрігер және 5 фельдшерден құралған жедел-жәрдем станциясының қызметкерлері қазір Ыстамбұл қаласында арнайы тәжірибеден өтіп жатыр. Бұл шара Түркістан облысы Қоғамдық денсаулық басқармасының қолдауымен жүзеге асты. Басты мақсат – медицина мамандарына соңғы технологияларды меңгеріп, жедел түрде науқастарды емдеуге даярлау.
Айта кетейік, біліктілігін шыңдау үшін Түркияға кеткен арнайы топ Түркістан, Кентау қалалары мен Ордабасы ауданындағы жедел-жәрдем станцияларының қызметкерлерінен жасақталған. Олар осы елдегі көптеген медицина мекемелерінде болады.
Жиналған тәжірибе өңірдегі жедел медициналық жәрдемнің сапасын арттыруға мүмкіншілік береді. Жыл соңына дейін тағы бірнеше топты шет мемлекеттерде оқыту жоспарланып отыр. Жалпы, өткен жылы Түркістан облысының ауруханалары мен емханаларында еңбек ететін 3 мыңға жуық медициналық қызметкер біліктілігін арттырды.
By Айғақ медиа
