Жер сілкінісі: Оқу жаттығу өтті

Түркістанда 1 наурыз — Азаматтық қорғаныс күніне орай сейсмикалық жаттығу жиыны өткізіліп, өрттің алдын алу жағдайы пысықталды. Төтенше жағдай орын алған кезде әрбір адам өмірінің және материалдық шығындарға әкеп соғатындықтан, азаматтардың қауіпсіздігін сақтау бойынша олардың дайындықта болуын талап етеді. Осыған орай, Түркістан облыстық Төтенше жағдайлар департаментінің ұйымдастыруымен әкімдік ғимаратында хабарландыру жүйесі іске қосылып, барлық қызметкерлер шұғыл түрде қауіпсіз аймаққа шығарылды.
Оқу-жаттығу жоспарына сәйкес, жер сілкінісі салдарынан облыс ғимаратының ішінде электр сымдарының қысқа тұйықталуынан өрт орын алды.Аталған өртті әкімдік қызметкерлері тарапынан құрылған өрт сөндіру тобы өз күшімен сөндіруге кірісіп, сөндіру мүмкіндігі болмағандықтан, Түркістан облысы Төтенше жағдайлар департаментінің 101 өрт сөндіру қызметіне және 112 құтқару қызметіне қоңырау шалып шақыртты. Мұнан соң, үшінші қабатта да өрттің ушығуына байланысты, далаға шығуға мүмкіндік бермей, бірнеше қызметкерлер 4-қабаттың балконына  және ғимараттың шатырына шығып көмек сұрады. Азаматтарды құтқару мақсатында Түркістан облысы Төтенше жағдайлар департаментінің «ӨСжАҚЖҚ» ММ-нің №1 мамандандырылған өрт сөндіру бөлімінің өрт сөндірушілері, автобаспалдақты іске қосып, балкондағы 2 қызметкерді құтқарып алды.
Сондай-ақ, «Шұғыл құтқару жасағы» кинологиялық қызметімен ғимарат ішінде қалып қойған немесе ес-түссіз қалған азаматтарды көмектесу мақсатында итпен іздестіру жүргізілді.
Жалпы сейсмикалық жаттығуға Түркістан облысы Төтенше жағдайлар департаментінен 11 бірлік техника мен 30 жеке құрамы жұмылдырылды.

Айғақ-ақпарат