Заман көшіне ілескен технология бүгінде адамзат тіршілігінің ажырамас бөлігіне айналды. Ал жасанды интеллектінің мүмкіндігі күн санап кеңейіп келеді. Шымкентте өткен «Shymkent AI Forum – 2026» өңірлік форумында озық технологиялар таныстырылып, цифрлық жаңашылдықтың бүгінгі тынысы мен келешегі талқыланды.
Жасанды интеллектінің бүгінгі дидарын танытып, оның тың мүмкіндіктерін көпшілікке көрсету – форумның басты мақсатының бірі. Осы орайда көрме алаңында IT-мамандар мен жоба әзірлеушілер өз өнімдерін таныстырды. Әрқайсысы технологияны тұрмысқа бейімдеп, адам игілігіне жаратуға бағытталған. Көрмедегі сондай жобалардың бірі – «Қалам» деп аталатын жасанды интеллект құрылғысы. Ол жазбаша пәрмен арқылы бірнеше функцияны орындауға мүмкіндік береді. Яғни, технологияны күрделі тетіктерсіз-ақ, жазу арқылы басқаруға болады. Құрылғының жұмыс істеу тәртібі мен мүмкіндіктері жайында жобаны әзірлеген бағдарламашы айтып берді.
Келесі бір ерекше жоба – қоқыс тастайтын орынға арналған ақылды құрылғы. Оның бақылау камерасы мен дыбыстық хабарлау жүйесі бар. Бұл шешім қоғамдық тазалықты сақтауға және тұрғындардың жауапкершілігін арттыруға бағытталған. Қарапайым тұрмыстық мәселені заманауи технологиямен шешудің бір үлгісі деуге болады.
Технологияның түпкі мұраты – адам өмірін жеңілдетіп, қоғам игілігіне қызмет ету. Форумда ұсынылған жобалар осы бағыттағы ізденістің ауқымын аңғартты. Ал мұндай басқосулар тың бастамаларға жол ашып, Шымкенттің цифрлық әлеуетін арттыруға дәнекер болмақ.