Жаңа оқу жылында Шымкент қаласының әкімдігі 234 білім беру грантын ұсынды. Бұл гранттар еңбек нарығында сұранысқа ие мамандықтарды қамтиды. Қала әкімдігі жанынан арнайы комиссия құрылып, гранттарды бөлу тәртібі бекітілді. Талапкерлер арасында конкурс өткізіліп, грант иегерлері анықталады. Нақты қандай талаптар сақталуы керек?
Шымкент қаласының әкімдігі 2026-2027 оқу жылына талапкерлерге 234 білім беру грантын бөлді. Гранттар 34 мамандық пен білім беру бағдарламалары бойынша 7 жоғары оқу орнына бағытталған. Бөлінген гранттардың басым бөлігі педагогикалық мамандықтарға тиесілі. Оның ішінде педагогикалық мамандықтарға – 148, техникалық бағыттарға – 34, қызмет көрсету саласына – 20, медицинаға – 10 грант қарастырылған. Бұл әкімдік гранты тек Шымкент қаласының талапкерлеріне арналған. Грант иегерлері оқуын толық 4 жыл аяқтап, диплом алғаннан кейін үшінші мегаполисте кемінде 3 жыл еңбек етуі тиіс. Бұл – грантты тағайындаудағы басты талаптардың бірі. Бүгінде қаладағы Мұхтар Әуезов атындағы Оңтүстік Қазақстан университетіне – 56грант бөлінсе. Ө.Жәнібеков атындағы Оңтүстік Қазақстан педагогикалық университетіне – 84 орын көлемінде берілді. «Мирас» университетіне 75, Оңтүстік Қазақстан медицина академиясына 10 грант қарастырылған. Ал Т.Жүргенов атындағы Қазақ ұлттық өнер академиясы мен «Нұр-Мүбарак» Египет ислам мәдениеті университетіне 2 гранттан, Қорқыт Ата атындағы Қызылорда университетіне 5 грант бөлінді. Қазіргі таңда аталған жоғары оқу орындары талапкерлерден құжат қабылдап жатыр.