Тәулік бойы тынымсыз қызмет. Қауіп пен қатерге қарамастан қоғамдық тәртіпті күзету. Бірі қылмыстың алдын алса, енді бірі адам өмірін сақтап қалу үшін жанын бәйгеге тігеді. Полицей болу мамандық қана емес, үлкен жауапкершілік. Кәсіби мерекелерін атап өткен тәртіп сақшылары қандай құрметке ие болды? Полицейлер күніне арналған салтанатты шара ең алдымен қызметтік міндетін атқару барысында қаза тапқан батырларды еске алудан басталды. Жиналғандар олардың рухына тағзым етіп, ерліктерін құрметпен еске алды. Марқұмдардың туыстарына арнайы сый-сияпаттар табысталды.
Салтанатты жиынға қала әкімі Ғабит Сыздықбеков қатысып, құқық қорғау қызметкерлерін кәсіби мерекемен құттықтады. Ол тәртіп сақшыларының қоғамдағы орны ерекше екенін атап өтіп, қауіпсіздік пен тұрақтылықты қамтамасыз етудегі еңбектеріне жоғары баға берді. Сонымен қатар бірқатар қызметкерлер марапатқа ие болды. Мерекелік шараға қазіргі қызметкерлермен қатар полиция саласының ардагерлері де қатысты. Көп жылын құқық қорғау жүйесіне арнаған мамандар жас буынға ақыл-кеңестерін айтып, бұл қызметтің тәртіпті, табандылық пен төзімділікті талап ететінін жеткізді. Олар тәжірибелі қызметкерлерден үйренудің маңызын ерекше атап өтті.
