МЕМЛЕКЕТ БАСШЫСЫНАН МАРАПАТ АЛҒАН ҰСТАЗ

Жақында ғана Мемлекет басшысы Қасым-Жомарт Тоқаев ел дамуына елеулі үлес қосып жүрген түрлі сала өкілдерін, соның ішінде білім беру жүйесінде аянбай еңбек етіп жүрген ұстаздарды мемлекеттік наградалармен марапаттау үшін салтанатты жиын өткізген болатын. Солардың қатарында Шымкент қаласындағы Төлеген Тәжібаев атындағы №47 мектеп-гимназияның қазақ тілі мен әдебиеті пәнінің мұғалімі Гүлмира Шералхан бар. 30 жылға жуық тәжірибесі бар маманға «Қазақстанның еңбек сіңірген ұстазы» құрметті атағы берілді.

Гүлмира Шералхан үшін бұл жай ғана мамандық емес, өмірлік мақсаты мен бала күнгі арманы болатын. Сол асыл арманы орындалып, ұлт тәрбиесіне, жас ұрпаққа сапалы білім мен өнегелі тәрбие беруге қолынан келгенше үлес қосып келеді. Білікті ұстаз ел болашағына сіңірген ерен еңбегі үшін бұған дейін «Ы.Алтынсарин» төсбелгісін иемденіп, былтыр ғана «Үздік педагог-2024» байқауының республикалық кезеңінде топ жарған. Ал бұл жолғы мәртебелі марапат «Қазақстанның еңбек сіңірген ұстазы» құрметті атағын ізденімпаз педагогке ел Президентінің өзі табыстады.

Гүлмира Шералхан – білім саласында ұзақ жылдан бері еңбек етіп келе жатқан білікті маман. Қазақ тілі мен әдебиеті пәнін оқытуда әдістемелік жаңашылдығы, шәкірттермен жұмыс істеудегі жоғары жауапкершілігі және білім сапасын арттыруға қосқан үлесі оны осы биік марапатқа жеткізді. Бүгінде Оның шәкірттері халықаралық және республикалық деңгейдегі байқауларда жүлде алып, білім бәсекесінде алдыңғы қатардан көрініп жүр.