ӘЛЕУМЕТТІК ҚОЛДАУДЫҢ МҮМКІНДІКТЕРІ

Шымкенттік кәсіпкерлер назарына. Қараша айынан бастап 5 млн теңге қайтарымсыз грант конкурсы басталмақ. Жыл басынан бері өткізілген бірінші және екінші лектің нәтижесінде 228 азамат грант иегері атанды. Бұл жолы 219 азаматқа грант беру жоспарланып отыр. Бұл туралы қала әкімінің орынбасары Сәрсен Құранбек баспасөз брифингінде айтты. Сонымен қатар қала аумағында болып жатқан одан да өзге маңызды жаңалықтармен бөліскен болатын.

Гранттардың басты мақсаты – азаматтарды кәсіпкерлікке ынталандыру, жаңа жұмыс орындарын ашу және экономиканы дамыту. Мемлекеттен берілген қаржы қайтарымсыз болғанымен, оның мақсатты жұмсалуы қатаң бақыланады. Еңбек мобильділігі орталығында арнайы мониторинг тобы жұмыс істеп, жобалардың іске асуын қадағалайды. Егер қаражат мақсатсыз жұмсалса, ол мемлекетке қайтарылады.

Бұл бастама – әлеуметтік санаттағы азаматтарға жаңа мүмкіндік беріп қана қоймай, Шымкенттегі кәсіпкерліктің дамуына серпін бермек.

Сонымен қатар, шаһарда әлеуметтік маңызы бар азық-түлік бағасын тұрақтандыру үшін бірнеше сауда нүктесі іске қосылған. Жыл соңына дейін тағы екі есе көбейту жоспарда тұр. Айта кетейік, азық-түлікті өндірушіден тікелей тұтынушыға жеткізу арқылы баға саясатын бақылауға болады. Ол үшін алдын-ала айналым қаражатын қолдау механизмі енгізілген. Сондай-ақ, Елде әлеуметтік маңызы бар азық-түлік тауарларының бағасын негізсіз көтерген кәсіпкерлерге қатысты қатаң шаралар қабылданады.