ИНФРАҚҰРЫЛЫМ МӘСЕЛЕЛЕРІ ШЕШІЛУДЕ

Тұран ауданының әкімі Берік Әшірбеков 8 айдағы атқарылған инфрақұрылымдық жетістіктер мен өзекті мәселелері туралы есеп берді. Қазіргі таңда тұрғындарды ауыз сумен қамтамасыз ету көрсеткіші — 100 пайызға жетіп отыр. Ал биылғы жарықтандырылмаған көшелердің барлығына 100%, яғни 333 көшеге жарықшам орнатылмақ. Осы және өзге де проблемалардың орындалуы барысы туралы келесі материалда.

Тұрғындарға ең керегі — ауыз су десек, бүгінде Тұран ауданына қарасты елді мекендердің 100 пайызы сапалы ауыз сумен қамтылған. Сонымен қатар, аудан аумағы 85,7 пайыз табиғи газбен, ал электр қуатымен 95,2 пайызы қамтылып отыр. Сондай-ақ, ауданның кәріз жүйесімен қамту көрсеткіші бүгінде 57,1 пайызды құрайды, бұл көрсеткішті биылғы жылы 60,2 пайызға жеткізу көзделіп отыр.

Баспсөз жиынында қоғамдық көлік мәселесі де айтылды. Тұрандықтар тарапынан келіп түсетін шағым бойынша қалада автобусты көбейту керектігін Берік Әшірбеков өз назарына алды. Өйткені Таңертең автобусқа сыймай, жолдан қалып қоятындар, сыйса да, аузы-мұрнына шыға толған автобус ішінде қысылып қиналатындар, немесе бір автобусты сағатқа жуық күтетіндер көп. Осы мәселеге аудан әкімі 1 қарашадан бастап автобус бөлінетінін жеткізді.

Аудан аумағында көгалдандыру жұмыстары қарқынды жүргізілуде. Соның нәтижесінде жаңа гүлзарлар бой көтеріп, тұрғындардың демалысына жайлы жағдай жасалуда. Әсем гүлзарлар қаланың ажарын ашып қана қоймай, табиғаттың тынысын сездіріп, шаһардың шырайын арттыра түсуде. Қысқасы, үлкен шаһардың бір бөлігі – Тұран ауданын жаңғыртып-көркейту жұмыстары тоқтамайды.