ҚЫЗМЕТКЕРЛЕР АРАСЫНДА СПАРТАКИАДА

Оңтүстік өңірлік спартакиада өз мәресіне жетті. Шараға Шымкент, Қызылорда, Түркістан және Жамбыл облыстарынан келген “Азаматтарға арналған үкімет” мемлекеттік корпорациясының мамандары қатысты. Қызметкерлер бес спорт түрінен өзара сайысқа түсіп, мықтылар анықталды. Бұл бастама – мемлекеттік қызметшілер арасында салауатты өмір салтын насихаттау, командалық рухты арттырып, ұжымішілік байланысты нығайту мақсатында ұйымдастырылды.

“Азаматтарға арналған үкімет” мемлекеттік корпорациясы 20 жылдан бері халыққа сапалы әрі үздіксіз қызмет көрсетіп келеді. Осыған орай және Мемлекеттік қызметшілер күні аясында өткен спартакиада жоғары деңгейде өтті. Ашылу салтанатында Мемлекеттік Ту көтерііліп, патриоттық ән шырқалды. 500-ге жуық қызметкер қатысқан бұл шара қатысушыларға зор серпін, көрерменге ерекше рух сыйлады.

 Шағын футбол, волейбол, арқан тарту, шахмат және үстел теннисі бойынша өткен сайыстарда 100-ге жуық маман өз бақтарын сынады. Шараның ресми ашылуына Шымкент қаласы әкімінің орынбасары Сәрсен Абайұлы Құранбек арнайы қатысып, жылы лебізін білдірді.

Жарыс қорытындысы бойынша 1-орынды – Шымкент қаласының командасы, 2-орынды – Түркістан облысы, 3-орынды – Қызылорда облысы иеленді. Жеңімпаз ретінде Шымкент филиалы республикалық деңгейдегі спартакиадаға жолдама алып, оңтүстік өңірдің намысын қорғайтын болды.