Шымкентте сән мен шариғат бір сахнада үйлесім тапты. «Әсем киім әйел ажары» атты республикалық сайыс аясында сымбатты да сұлу қыз-келіншектер шариғат талаптарына сай келетін, заманауи үлгідегі сәнді киім топтамаларын ұсынды. Шараға 6 шебер дизайнер қатысып, өз қолдарынан шыққан сән үлгілерін көпшілік назарына ұсынды.
Қазақстан мұсылмандары діни басқармасының ұйытқы болуымен өткен бұл байқауда әр дизайнер 40 түрлі киім үлгісін сахна төрінде дефиле арқылы көрсетті. Киімдер шариғатқа сай, жабық үлгіде тігілгенімен, сән мен талғамнан кенде емес. Жобаның басты мақсаты — ислам дінінің талаптарына сай киінетін арулардың да сән әлемінен шет қалмай, өз стильдерін қалыптастыруына мүмкіндік беру.
Үшінші мәрте ұйымдастырылып отырған бұл республикалық байқау шариғат нормаларына сай киім үлгілерін ұсынатын арулар үшін үлкен мүмкіндік саналады. Сән әлемінде 5 жылдан аса тәжірибесі бар жеңімпаз ару бас жүлдені жеңіп алып, 100 мың теңгелік сертификатпен марапатталды. Сонымен қатар, ол Алматы қаласында өтетін келесі республикалық байқауға жолдама алды.Жеңімпаздан өзге де қатысушы арулар назардан тыс қалған жоқ. Оларға 2 және 3 дәрежелі дипломдар мен арнайы алғыс хаттар табысталды. Мұндай байқаулар қазақи болмыс пен ислам құндылықтарын ұштастыра отырып, сән әлеміне жаңа серпін берері сөзсіз.
