Ұлттық ұлан қатары 150-ден астам жас жауынгермен толықты. Шымкенттегі 6698 әскери бөлімінде Отан алдындағы борышын өтеуге келген сарбаздар салтанатты түрде әскери ант қабылдады. Бұл – әрбір ер азаматтың еліне деген адалдығы мен жауапкершілігін айқындайтын маңызды сәт. Салтанатты рәсім барысында жас сарбаздар туған жерді қорғауға серт беріп, азаматтық парызын адал атқаруға дайын екендерін көрсетті.
Отан қорғау – әр азаматтың қасиетті борышы. Ер жетіп, ел қорғаймын деген мақсатпен келген сарбаздарды бір жылдық әскери өмір күтеді. Ұлттық ұланның 6698 әскери бөлімі – темірдей тәртіп пен жоғары жауынгерлік дайындық мектебі. Мұнда келген әр сарбаз әскери өмірге бейімделіп, тәртіп пен тәрбиеге үйренеді. Әскери ант қабылдаған жас жауынгерлер үшін бұл күн – жаңа өмірге, үлкен жауапкершілікке жасалған алғашқы қадам. Олар үшін бұл рәсім – өз елінің нағыз қорғаны болуға берген серті. Әскери ант – бұл бұзылмайтын заң, бұл жолдан кері қайту болмайды.
Ант қабылдаған сәтте сарбаздардың бойынан патриоттық рух пен жігер сезілді. Әскери өмірдің алғашқы баспалдағына аяқ басқан олар – тәртіп пен тәрбиеге берік, ел қорғайтын нағыз азаматтар. Ал ата-ана үшін ұлының әскер қатарына қосылғаны үлкен мәртебе.
Шымкенттегі 6698 әскери бөлімінде өткен салтанатты шараға бөлім басшылығы, Ұлттық ұлан ардагерлері және сарбаздардың ата-аналары қатысты. Сонымен қатар, ант қабылдау рәсімі кезінде әскери оркестр патриоттық әндер шырқап, жас сарбаздардың рухын көтеретін театрландырылған қойылымдар қойды. Қазіргі таңда 6698 әскери бөлімінде 200-ден астам сарбаз борышын өтеп жатыр. Олардың қатарына қосылған 150 жас сарбаз енді бір жыл бойы отан алдындағы парызын абыроймен атқаруға кіріседі. Жауынгерлік өмірдің алғашқы сатысынан өткен жас сарбаздар алдағы уақытта елдің тыныштығы мен қауіпсіздігін сақтау жолында қызмет атқарады. Олар – болашақ офицерлер, ел қорғаны болар ер азаматтар.
