Қазақстан электр энергетикасы тауарларын сатып алуда 42,6 пайыз импортқа тәуелді. Бұл туралы Мәжіліс депутаты Еділ Жаңбыршин мәлім етті.
— Біздің еліміз биыл 10 айда 48,4 млрд долларға электр энергетика тауарын сатып алды. Оның ішінде 1,8 млрд долларға отын энергетикасы тауарларын, 4,88 млрд долларға металл және металдан жасайтын бұйымдар және 20 млрд доллардан астам сомаға көлік құралдары мен аппараттары сырттан сатып алынды. Демек электр энергетикасы тауарлары бойынша 42,6 пайыз импортқа тәуелдіміз, — деді Еділ Жаңбыршин елордада «Электр энергетика саласындағы отандық тауар өндірушілерді мемлекеттік қолдау шаралары» атты тақырыпта өткен дөңгелек үстелде.
Одан әрі Мәжіліс депутаты бірнеше елмен электр энергетикасы саласындағы келісімшарттың жасалып жатқанын мәлімдеді. Оның қатарында Сауд Арабиясы, БАӘ және Қатар елдері бар.
— Бізге алдымен электр энергетикасы бойынша қандай тауарларды сырттан сатып алып жатырмыз соның базасын жасау керек. Екіншіден, елімізде электр энергетикасы өндіруші ұйымдардың оның ішінде ірі компаниялардан бастап, кәсіпорындар мен жауапкершілігі шектеулі серіктестіктердің тізімін жасақтау қажет, яғни отандық тауар өндірушілердің пулын құруымыз тиіс. Келесі құзырлы органдар мен тауар өндірушілердің басын қосып, ортақ мәселелерді бірлесіп талқылау қажет. Төртіншіден, заңнаманы жетілдіру керек. Президент отандық тауарларды сатып алу үлесін 60%-ға жеткізу керектігін баса айтты, — деп түсіндірді халық қалаулысы.
Бұған дейін хабарлағанымыздай еліміздегі электр стансалары мен электр желілерінің 70 пайызын жаңғырту қажет, яғни тозған.
ҚазАқпарат
