Ұлттық сөз өнерін азаматтық беделімен биік белеске көтерген Сәкен Сейфуллин, Ілияс Жансүгіров, Бейімбет Майлин ғұмырлары қысқа, тағдырлары ауыр болғанымен, шығармашылығы ғибратты да мәнді болды. Биыл Үш бәйтерегіміздің туғанына 130 жыл. Осыған орай, шаһарымызда Қазақ әдебиетінің «Үш бәйтерегі» атты әдеби кеш өтті.
Халқымыздың ұлттық әдебиетінің қалыптасуы мен дамуына өлшеусіз үлес қосқан үй бәйтек Сәкен, Ілияс, Бейімбет өздерінің жазған туындыларымен адамдардың жаңа заманға сай сауатты болуына, ой-өрісінің өсуіне зор ықпал етті. 1894-1938 жылдар аралығында қатар өмір сүрген халқының асыл перзенттері еліміздің өндіріс орындары мен еңбек адамдарының игі істерін шығармаларына арқау етті. Ұлтының азаттығын аңсаған қазақ зиялылары кеңес үкіметі тұсында Алашордашыл – ұлтшылдар атанып, 20 ғасырдың отызыншы жылдар ойранында қуғын-сүргінге ұшырап, жазықсыз жазаланды.
Кеш барысында үш қаламгердің тағдыры мен шығармашылығы жайлы, сол замандағы әдеби үдеріс жөнінде қызықты да танымды деректер айтылды. Сонымен қатар, М.Әуезов атындағы Оңтүстік Қазақстан университетінің студенттері «Үш бәйтерекке» атты әдеби-сазды композициялық қойылым қойып, көрерменнің қошеметіне бөленді.
Қазақ халқы «Үш бәйтерек» деп атап кеткен Ілияс Жансүгіров, Сәкен Сейфуллин, Бейімбет Майлин қазақ әдебиетіне айтулы ақын, қарымды қаламгер, дарынды драматург ретінде үлкен үлес қосты. Олардың қаламынан Қазақстанның дарқан даласы, өндіріс орындары мен еңбек адамдарының іс — әрекеттері, өмірге деген құштарлықтары, болашаққа үміт – сенімдері кеңінен көрінеді.
