Шымкентте Кеңес Одағының Батыры Қарақозы Әбдәлиевті еске алуға арналған бокстан халықаралық турнир өтті. Қала әкімі турнирге қатысып, қазақстандық боксшылардың финалдық жекпе-жегін тамашалады.
Жарысқа еліміздің үздік боксшылары, сондай-ақ Украина, Түркия, Өзбекстан, Тәжікстан және Қырғызстаннан келген былғары қолғап шеберлері қатысты. Сайыста ел боксшылары негізгі құрамда өнер көрсетті. Өйткені турнирдің маңыздылығы жоғары. Отандық бапкерлер, жарыс жолын сәтті аяқтап, жеңімпаз атанған спортшыларды Иордония астанасы Амманда өтетін Азия біріншілігіне алып барады
Бұл 43-турнир, дегенмен биыл қазақстандық боксшылар үшін ерекше маңызға ие. Жарыстың барынша әділ өтуі үшін арнайы шетелдік мамандар да тартылған. Жыл сайынғы дәстүрге айналған турнир, «Ірі жарыстар іріктеуі» — дейді Біржан Жақып. Биыл 43-рет өтіп отырған додаға бір кездері Олимпиада чемпиондары – Бақтияр Артаев, Васили Жиров, Ермахан Ибрагимов сынды мықтылар қатысқан. Биыл да бәскелелестік пен қатысушылар деңгейі жоғары. Турнирде, Париж олимпиадасының қатысушылары Сәкен Бибосынов, Махмұд Сабырхан сынды бірінші нөмірлі спортшылар бақ сынады. Дүбірлі додаға қала әкімі қатысып алғы сөз алды. Айтуынша, сайыстың жас өренге көрсетер өнегесі, тәлімі мол. Жарысқа сондай-ақ аға буын өкілдері шақырылып, жас боксшыларға сәттілік тіледі. Жарыс қорытындысына сәйкес, турнирде үздік өнер көрсеткен спортшылар жүлделі орындардан бөлек «Үздік техника», «Жылдам боксшы», «Әділ төреші» сынды номинациялармен де марпатталды.
Енлеше, финалдық жекпе-жектер өтіп, алтын жүлдені иеленген спортшылар анықталды. Назарларыңызға жеңімпаздардың тізімін ұсынамыз:
48 келіге дейінгі салмақта: Теміртас Жүсіпов
51 келіге дейінгі салмақта: Дамир Әбдіқадыр
54 келіге дейінгі салмақта: Нұрсұлтан Алтынбек
57 келіге дейінгі салмақта: Оразбек Асылқұлов
60 келіге дейінгі салмақта: Бейбарыс Жексен
63,5 келіге дейінгі салмақта: Ертуған Зейнуллинов
67 келіге дейінгі салмақта: Мұхаммедсабыр Базарбайұлы
71 келіге дейінгі салмақта: Сабыржан Аққалыков
75 келіге дейінгі салмақта: Диас Молжігітов
80 келіге дейінгі салмақта: Ерасыл Жақпеков
86 келіге дейінгі салмақта: Бекзад Нұрдәулетов
92 келіге дейінгі салмақта: Сағындық Тоғамбай
92 келіден жоғары салмақта: Айбек Оралбай
Айта кетейік, жарысқа Қазақстанның барлық аймағынан және бірнеше елден 150 боксшы қатысты. Осымен 43-рет өткен бұл турнирде Қазақстан боксшылары Азия чемпионатына іріктеліп, құрам жасақталады.
