Түркістан облысына ҚР Премьер-министрінің кеңесшісі Ералы Тоғжанов жұмыс сапарымен арнайы келді. Ол өңірдегі «Ауыл аманаты» жобасы бойынша атқарылған жұмыстармен танысып, осы жобаны жүзеге асыру жөнінде кеңейтілген мәжіліс өткізді. Жиында Ералы Тоғжанов облыс тұрғындарының әлеуметтік-экономикалық жағдайы ауыл шаруашылығына тікелей байланысты болғандықтан, тек мал шаруашылығына ғана емес, өзге де салаларға да басымдық беру керек екенін айтты. Сондай-ақ, жауапты басқармалар мен ауылдық округ әкімдеріне жобаны талапқа сай іске асыруды тапсырды.
Күні кеше ғана облыс әкімі аппаратында ҚР Премьер-министрінің кеңесшісі Ералы Тоғжанов пен Түркістан облысының әкімі Дархан Сатыбалды, басқармалар мен аудан, қала басшыларымен бірге кеңейтілген мәжіліс өткізді. Мәжілісті жүргізген өңір басшысы «Ауыл аманаты» жобасының облыс үшін маңызы жоғары екенін жеткізді. Сондай-ақ, жиында Түркістан облыстық ауыл шаруашылығы басқармасының басшысы Нұрбек Бадырақовтың баяндамасы тыңдалды. Оның айтуынша, «Ауыл аманаты» жобасы, ауыл тұрғындарының табысы мен әлеуметтік жағдайларының көтерілуіне ықпалын тигізді. 2023 жылы Республикалық бюджеттен бағдарламаны жүзеге асыруға 19,8 млрд. теңге бөлініп, негізгі 6 бағытты қаржыландыруға басымдылық беріліп, 3256 жоба қаржыландырылған. Жобаға пилоттық түрде 64 ауылдық округі қатысты. Жалпы Түркістан облысында “Ауыл аманаты” бағдарламасы бойынша жеңілдетілген несие былтырдан бастап беріле бастаған. Нәтижесінде 3413 жаңа жұмыс орындары құрылды, атаулы әлеуметтік көмек алушылар саны 340 адамға қысқартылып, табыс көзі орташа жалақы 20 пайызға ұлғайды, шағын кәсіпкерлер саны 2 544 бірлікке артқан. Осы жобалар есебінен 30 млрд. теңгенің өнімі өндірілген.
“Ауыл аманаты” халықты тұрақты жұмыспен қамтамасыз ету, ауыл әлеуетін тиімді пайдалану арқылы ауыл экономикасын және халықтың өмір сүру деңгейін көтеруге үлкен мүмкіндіктер беретін жоба. Дегенмен, қазіргі таңда халықты жұмыспен қамту, ішкі миграциялық мәселелер, тағаммен қамтамасыз ету салалары ақсаңдап тұрғанын жеткізген, премьер-министрінің кеңесшісі Ералы Тоғжанов жауаптыларға осы тұрғыдағы жұмыстарды жүйелендіру керегін айтты.
Сондай-ақ, мәжілісте «Ауыл аманаты» жобасын жоғары деңгейде жүзеге асырған Ақтөбе облысы, Мәртөк ауылдық округінің тәжірибесі көпшілікке баяндалса, ақтөбелік кооперативтің жетістіктері де үлгі ретінде ұсынылды. Айта кетейік, Былтыр «Ауыл аманаты» жобасы аясында 17 мың несие беру үшін 100 млрд теңге бөлініп, қаражаттың негізгі бөлігі Жамбыл, Түркістан, Ақтөбе және Алматы облыстары үшін қарастырылған.
