Мемлекет және қоғам қайраткері, ҚР Парламенті Мәжілісінің депутаты Мұрат Әбенов өзінің Twitter парақшасында Қазақстан тағамтану академиясының президенті, академик Төрегелді Шарманов туралы жазба қалдырды.
“Барып тұрған ұлтшыл”
Қонаев: «Нағыз керегі осы»
Бүгін Қазақстан тағамтану академиясының президенті, әлемдік денсаулық сақтаудың аңызы және қазақстандық медицинаның мақтанышы, Қазақстан Республикасының жоғары дәрежелі «Еңбек ері» белгісінің иегері, академик Төрегелді Шарманов өмірден өтті.
Иманды болсын. Қайғыға ортақтасып отбасына көңіл айтамын.
Ерекше құрмет тұтатын ағамыз туралы естелік.
ҰЛТҚА АДАЛ ҚЫЗМЕТ ЖАСАҒАН МИНИСТР
Төрегелді Шарманов естелігінен : “Денсаулық министрі болып маған дейін орыс отырды 10 жылдай. Кезек келген сияқты. Қонаев керемет азамат еді ғой. Соны ауыстыру керек болғанда менің кандидатурам түседі есіне.
Ол кезде Ақтөбеде ректормын. Фазылов дейтін бөлім меңгерушісінен мен туралы пікір білуді тапсырады, қандай характеристика береді екен дейді. Сұрайды. Сосын Қонаевқа келіп: «Сұрадым. Жақсы ұйымдастырушы, білгір басшы деп жатыр. Бірақ… Бірақ, барып тұрған ұлтшыл дейді»,- депті. Сонда Қонаев: «Нағыз керегі осы», — депті.
Оны кейін естідім. Бір жылдан кейін сол Фазылов: «Қалай келгеніңді білесің бе, Димекең осылай айтқан еді. Қиын жағдай болады ғой деп, біз айтқан жоқпыз»,- деді.
Жүрегі қандай Дінмұхамед Ахметұлының… Соған тойтарыс берудің өзі қиын дүние ғой қарасақ. Ұлтшыл деп айып тағып жіберуге де болады. Мен бірақ айыптан қорыққан жоқпын. Сөйтіп он жылдан аса министр болдым. Министрлікте жүріп Дүниежүзілік денсаулық сақтау ұйымы мен ЮНИСЕФ арқылы алғашқы медициналық жәрдем тақырыбында Алматы халықаралық конференциясын ұйымдастырдым. Оны БҰҰ Дүниежүзілік денсаулық сақтау ісіндегі ең ірі оқиға деп таныды. Қорытындысында декларация қабылданып, барлық мемлекеттер адамдарға алғашқы медициналық көмек беру құқығына ие болды. Декларация Ұлы Хартия аталып кетті.”
