Шымкентте Сейтжан қари Есжанұлы мешіті ашылды. Бір мезетте 12 мыңға жуық жамағат бас иетін зәулім мешіт Гиннестің рекордтар кітабына енбек. Салтанатты шараға Құран кітабын жазған тегі қазақ, ислам әлеміне танымал тұлға Осман Тоха, еліміздің бас имам, жергілікті тұрғындардан бөлек, мұсылман елдерінен ғалым, хафиздар, қонақтар көптеп келді. 12 га аумаққа салынған мешіттің қандай ерекшелігі мен артықшылықтары бар?
2014 жылы капсуласы салынған Алланың жердегі үйін қала халқы, жалпы мұсылман қауым ерекше күтті. Күннің райы қолайсыз болғандықтан ашылу рәсімі мешіттің ішінде өтті. Осы сәтте мешіттің айналасына жиналған мыңдаған жамағат тілекші болып тұрды.
Сейітжан қари Есжанұлы атындағы үлкен мешіттің ашылуына арнайы келген саудиялық шейх, әйгілі каллиграф Осман Тоханың бұл елімізге алғашқы сапары. Түбі Түркістаннан тараған ол ата-жұртына келгеніне шексіз қуанышты екенін жеткізді.
Құран әріптерін үш жыл бойы көркемдеп жазып шыққан Осман Тохаға Мемлекет басшысының атынан арнайы шапан жабылды. Ал, ҚМДБ төрағасы, бас мүфти Наурызбай қажы Тағанұлы өз атынан және жамағаттың атынан мешіттің бой көтеруіне ұйытқы болған Серікжан Сейітжановқа сый-сыяпат табыстады.
Мегаполис мэрі Ғабит Сыздықбеков Президент Қасым-Жомарт Тоқаевтың құттықтау тілегін жеткізді.
Шараға Сенат палатасынан Әли Бектаев, Мәжіліс мінберінен Данабек Исабеков қатысып, бас қаладан жолданған арнайы құттықтау хаттарын оқыды. Сенатор ізгілік пен бірліктің мекені саналатын мешіттің ашылуымен құттықтады.
Мешіт құрылысының идеясын ұсынушы «САУТС-ОЙЛ» компаниясының басшысы Серікжан Сейітжанұлы өзінің бастамасы, игі істі іске асырудағы мақсаты жайлы баяндады.
— Қаламыздың көркем жерлері мен түрлі символдары жетерлік. Бізде Шымкент халқының бейбітшілігі пен қонақжайлығының, рухани байлығы мен мейірімділігінің нышаны болатындай тағы да бір айырықша символ жасап шықсақ дедік.
Сейітжан қари Есжанұлы атындағы Үлкен мешітке Серікжан Сейітжанұлының әкесінің аты берілген. Ол әйгілі ұстаз, математика пәнінің мұғалімі, Ұлы Отан соғысының ардагері, Орта Азия мемлекеттік университетінің елімізден шыққан алғашқы түлектерінің бірі болған. Бар ғұмырын ұстаздыққа арнап, кейін мектеп директоры болып қызмет еткен. Құлшылық пен дұға ету орны, әр жанға рухани ілім мен тәрбие беруші қасиетті мекен, халықтың дін туралы көзқарасына ықпал етуші, ағартушылық мәні бар насихат ордасы жайлы қоғам қайраткері Қуаныш Айтаханов жылы лебізін жеткізді.
Сейітжан қари Есжанұлы атындағы Үлкен мешіт Шымкент қаласының жаңа әкімшілік-іскерлік орталығында орналасқан. Мешіт 4 мұнарадан тұрады. Негізгі бас күмбездің биіктігі 56 метр. Негізгі орталық кіреберіс есіктен ер азаматтар кірсе, сол жақ тұсындағы есік әйел адамдарға арналған. 12 мыңға жуық мінәжәт етушілердің сыю мүмкіндігі бар, ал кіреберіс алаңда бірден 10000-ға жуық келушілер жинала алады. Сондай-ақ, бұл ғимаратта 1100 орынға арналған конференц-зал, 600 орынға арналға ас беру орны, 100 орынға арналған неке қию залы, 428 орынға аарналған кіші дәрет алу орны, медресе мен кітапхана бар. 300 балаға арналған медресеге құрметті қонақ Осман Тоханың есімі берілді.
Келушілер көлігін ыңғайлы етіп қою үшін 2 қабатты автотұрақ та қарастырылған. Ішкі сәулеті де көз тартады. Қазақы нақышпен көмкеріліп, қабырғасына Құран сүрелері жазылған.
Сейітжан қари Есжанұлы атындағы жаңа мешіт оңтүстік өңірі тұрғындарының рухани орталығы ғана болмай, Шымкент қаласының көрнекті орындарының біріне айналмақ. Жоғарыда айтқанымыздай, мешіттің ашылуын қала халқы ұзақ күтті. Айтулы күні жергілікті тұрғындар кешеннің бой көтеруіне ықпал еткен жандарға ақ тілегін жеткізді.
Еліміздегі көлемі жағынан екінші орынды алатын, Гиннестің рекордтар кітабына енгелі жатқан мешіттің бас имамы болып белгілі ұстаз, исламтанушы, Құраннан 5 қырағат иесі, хафиз Ерсін Әміре бекітілді.
Іс-шара соңында Бас мүфти жамағатқа уағыз айтып, жұма намазын оқыды.
