Мүмкіндігі шектеулі жандар 18-жастан кейін де назардан тыс қалмауы керек. Үкіметтен берілетін қолдау, мүмкіндік, қаражат қысқармағаны абзал. Өйткені емі жоқ, жазылмайтын дерті бар жандар кейде қараусыз, қоғамнан сырт қалады. Бұл әрине ата-анаға өте ауыр салмақ. Осы мәселенің аясында Шымкентте бірінші рет жиналыс өтіп, ұсыныс айтылды. Қазақстанда Адам құқықтары жөніндегі уәкіл жұмыс істеп жатыр. Мақсаты адамның бұзылған құқықтары мен бостандықтарын қалыпқа келтіру, жәрдемдесу. Шағым келіп түскен күннен бастап 15 күннің ішінде өз құзыреті шегінде қарайды. Осы мекеменің ұйытқы болуымен мүмкіндігі шектеулі жандардың жағдайы талқыланды. Шипажайға 18-жасқа толмаған балалардың қалай демалатыны айтылды.
Елімізде тағдыр тауқыметіне түсіп, туа бітті мүгедек болып жатқандар және жол көлік апатынан мүгедек болғандар өте көп. Еліміз мүмкіндігі шектеулі жандарды мемлекеттік — әлеуметтік жәрдемақыны алушыларды үш топқа бөледі. Жалпы аурулар бойынша, әскери қызметте жарақат алғандар және мемлекеттік орган қызметкерлеріне арнайы тағайындайлады. Жиындағы мәселен туа бітті мүгедектер мен бала кезінде мүгедек болған жандарға қатысты.
Мүмкіндігі шектеулі балалар қазіргі таңда өте көп. Олардың барлығына бірдей көмек көрсетіліп жатқан жоқ. Мүмкіндігі шектеулі балаларға мемлекет тарапынан, Білім министрлігі тарапынан мүмкіндігі шектеулі балалардың білім алуына аса назар аударылса, дені сау балалардың алдында еңселерін тік ұстап жүретіндей дәрежеге жетуге көмек қолын созса екен деген ұсыныс айтылды. Ата-аналар мемлекет тарапынан қандай құқықтары бар екенін білмейді.
Мүмкіндігі шектеулі жандарға беріліп отырған жәрдемақы жеткіліксіз. Мұнан өзге күтуші мен қараушыға берілетін қаражатта өзгеріс бар, айырмашылық көп. Осы мәселе бойынша ата-аналар наразылығын айтты. Жиынға қатысқандар әрбір ұсынысты жазып алып, Үкіметтегі тиісті сала мамандарына жолдайтынын жеткізді.
«Айғақ-ақпарат»
