Қазақстан халқына қоғамдық қоры Шымкентке 4,7 млрд теңге аударған. Ал, қор құрылған екі жылдың ішінде азаматтар 156,9 млрд теңге салыпты. Бұл қаржының басым бөлігі денсаулық сақтау саласына жұмсалуда. Мәселен, мегаполистегі күрделі аурумен ауыратын 50 науқастың дәрі-дәрмегіне 4,5 млрд теңге бөлінген.
Қор мәліметінше бүгінгі таңда медицина, білім беру, спорт, әлеуметтік қолдауды қоса алғанда, 6 бағытта 35-тен астам қайырымдылық бағдарламасы іске асырылуда. Екі жыл ішінде 40-тан астам жобаны іске асырған қоғамдық қор жоғарыда атап өткеніміздей, негізгі басымдықты денсаулық саласына бөлген. Қорға түскен қаражаттың 60 пайызы осы салаға бөлінеді. Дөңгелек үстел барысында «Қазақстан халқына» қоғамдық қорының басқарма төрағасының орынбасары Ләззат Шыңғысбаева қордың қайырымдылық бастамалары мен Шымкент қаласында іске асырылған жобалар туралы айтты.
Басқосуға қала әкімінің бірінші орынбасары, жергілікті атқарушы органдар, мәслихат депутаттары мен жұртшылық өкілдері қатысты.
Төраға орынбасары керекті білім, медицина, оңалту орталықтары секілді нысандарға жерді бөлу, құрылысты жүргізу жергілікті жердің әкімдігі тарапынан жүргізілетінін баса айтты.
Қоғамдық қор білім саласына 20 млрд, арнайы білім ұяларына 1,1 млрд бөліп отыр. Сондай-ақ, 2024 жылдың соңына дейін 14 өңірде 76 спорт нысанын салуды жоспарлаған. Қордың көмегімен өңірлерде нейрохирург мамандарды оқыту және медициналық технологиялар трансферті арқылы балаларға нейрохирургиялық қызмет көрсетуге мүмкіндік жасалуда. Яғни, балаларға нейрохирургиялық ота бұрындары ірі қалаларда ғана жасалса, енді өңірлерде жасалады.
