«ЗАҢ КЕРУЕНІ» АКЦИЯСЫ ӨТТІ

Абай ауданында прокуратура қызметкерлерінің ұйымдастыруымен тұрғындарға құқықтық көмек көрсетілді. Акцияның негізгі мақсаты құқықтық мәдениет деңгейін арттырып, заңдарды түсіндіру. Ашық форматтағы басқосуға келген жұрт өздерін толғандырған мәселелерін тікелей прокуратура мен басқарма өкілдеріне қойып, жауап алды.

 Акция аясында атқарушы жұмысшы топ мүшелері тұрғындардың сұрақтарына жауап берді. Атап айтқанда, Шымкент қаласын прокуратурасы бастаған полиция басқармасы, кәсіпкерлік, жер қатынастарының мамандары, Сондай-ақ, тұрғын үй коммуникация басқармасы мен өзге де сала өкілдері жұрттың сауалына үн қатып. халықтың мұң-мұқтажын тындады. Айта кетсек, аталған профилактикалық жұмыстардың басты міндеті — жергілікті жерлердегі халыққа жедел құқықтық көмек көрсетіп, тәртіпті нығайту үшін азаматтық қоғам мен құқық қорғау, жергілікті атқарушы және уәкілетті органдардың күш-жігерін біріктіру болып отыр.

Жергілікті билік өкілдеріне талап-тілегін арқалай келгендердің бірі — Абай ауданының тұрғыны Әбдіманап Ақмолда. Ол өзінің арызында жол қозғалысы мәселесін айтып, қауіпсіздік шараларының сақталмай жатқанын алға тартып өтыр. Айтуынша, шаһардағы кейбір көшелерде жолдың қарама-қарсы бетіне өтуге мүмкіндік жоқ. Яғни жаяу жүргіншілер жолағына қажеттілік туындаған.

Акция — қоғамдағы белсенді халық пен мемлекеттік органдардың диалогын нығайтып қана қоймай, үйлесімді жұмысты атқаруына сеп болуда. Себебі бұған дейінгі кездесулерде көтерілген түйіндердің барлығы дерлік оң шешімін тауып келеді. Аталған профилактикалық шара аясында, Абай ауданының әкімі де тұрғындардың ұсынысын тыңдап, оларды іске асырудағы басты міндеттерді жолға қою қажеттігін айтты. Бұл ретте, Бұхарбай Парманов келіп түскен өтініштердің басым көпшілігі инфрақұрылым төңірегінде өрбігенін алға тартты.

Айта кетсек, «Заң керуені» акциясы Республикамыз бойынша Мемлекет басшысы Қасым-Жомарт Тоқаевтың бастамасымен жаңа Қазақстан мен әділетті қоғам құру бағытында қолға алынып отыр. Бүгінде аталған шара қатарынан 4-ші күнге созылып, қараша айының 14-ші жұлдызында қорытындыланбақ