ӘСКЕРГЕ ШАҚЫРЫЛУШЫЛАРДЫҢ САНЫ АРТҚАН

Шымкентте күзгі әскерге шақыру науқаны қызу жүріп жатыр. Бірінші қыркүйектен бастап 18 жасқа толған азаматтар тұрғылықты жері бойынша жергілікті әскери басқару органдарында медициналық комиссиядан, психологиялық тесттерден және жеке әңгімелесуден өтуде. Биыл мегаполисімізден 800-ден астам ер-азаматты шақырту жоспарланған.

Қаламызда 2022 жылғы мерзімді әскери қызметке шақырту науқанының басталуына орай, сыбайлас жемқорлықтың алдын алу мақсатында қалалық жергілікті әскери басқару органдарының басшылық құрамына әдістемелік-нұсқаулық жиыны өтті. Онда ҚР Қарулы күштерінің басшылығымен бекітілген жоспарға сәйкес, өңірлерде жергілікті әскери басқару органдарына күзгі әскерге шақыруды сапалы ұйымдастыру бойынша бірқатар тапсырмалар берілген.

Алқалы жиынның жалғасы қалалық әкімдікте өтті. Оған қала әкімінің бірінші орынбасары Шыңғыс Мұқан қатысты. Онда  ҚР Қорғаныс министрлігі өкілдері, қаланың аудандық шақыру комиссияларының төрағаларымен бірлесе әскерге шақыруды ұйымдастыру және өткізу мәселелерін талқылады. Өз кезегінде әкім көктемгі науқан өз деңгейінде өткенін тілге тиек етіп, ағымдағы жылдағы шара да өз деңгейінде өтуі қажет екенін тапсырды.

Алдағы уақытта әскерге шақыртылған азаматтарды толық тексеру жұмыстары сапалы жүргізілмек. Медециналық комиссиялардың құрамы да толытырылады.Сондай-ақ әскерге шақыру комиссияларының төрағалары мен мүшелеріне қолданыстағы заңнама талаптарына сәйкес жұмыс істеу жүктеліп отыр.