Түркістан облысы Бәйдібек ауданындағы Боралдай тауының маңында Тұттыбұлақ үңгірі орналасқан. Өңірдегі тарих қақпасында қазба жұмыстары 2018 жылдың тамыз айында басталған. «Сырдария-Түркістан» табиғи паркінің қорғау аймағына кіретін үңгірден алынған күл мен топырақ Германия мемлекетіне жіберіліп, нәтижесінде қазақстандық ғалымдардың 41 мың жыл бұрынғы деген шешіміне 7 мың жылды қосып отыр. Тау-тасты аралап жүрген археологтар бұл маңнан былтыр адамның жақ сүйегін, тас құралдарын тапқан. Ал, 4-5 күн бұрын аю тісі мен палеолит заманында тұрмыста пайдаланылған жабдықтарға қол жеткізді. Мамандардың пікірінше, бұл алғашқы қауымдық құрылыста тіршілік еткен адамдардікі болуы бек мүмкін.
Көне заттарды іздеу инемен құдық қазғандай. Археологтардың тарихи қазба жұмыстарында екбектері зор. Таңғы 8-ден кешкі 5-ке дейін шаң басқан тарихи жәдігерлерді табу үшін топырақ қабатын қазады. Жарда қалған іздер топырақ қабатының таңбалары. Бүгінгі археологтар діттеген заманына жету үшін әлі 1,5 метрде тереңдікке бойлауы қажет.
Палеолит заманының ескерткіштерін анықтау мақсатындағы экспедиция 40 күндік жұмыстан соң, тамыз айында өзге өңірді аттанатын болады. Ұлттық музейдің Ғылыми зерттеу орталығының ұйымдастыруымен музейдің бас ғылыми қызметкері, тарих ғылымдарының докторы, академик Жәкен Таймағамбетов бастаған қазақ-орыс, қазақ-неміс, қазақ-жапон халықаралық экспедициялары Қаратау жотасынан бұрын-соңды белгісіз боп келген палеолит дәуіріне тиесілі 85 үңгір анықталған. Топтың белсенді өкілдерінің бірі Алматы облысының тумасы Абай Нәмен археологиялық қазба жұмыстарына 7 сыныбынан бері қызығушылық танытып, бүгінде Германияның Тюбинген университетінің докторанты. Жас археологтың сөзінше, заттар топырақ күйінде табылып, шелекке салынады. Одан соң арнайы електен өткізіліп, таза суға жуылып, ғылымға қажетті барлық зерттеулер өтеді.
