AMANAT партиясы XXIII Съезінің делегаттары ҚР Парламент Мәжілісінің төрағасы Ерлан Қошановты партия төрағасы етіп сайлау туралы ұсынысты бірауыздан қолдады, деп хабарлайды ҚазАқпарат тілшісі.
AMANAT партиясының атқарушы хатшысы Асхат Оралов съез делегаттарына ҚР Президент Қасым-Жомарт Тоқаевтың Ерлан Қошановты партия төрағалығына сайлау туралы ұсынысына дауыс беруді ұсынды.
Дауыс бергендер Мәжіліс спикерінің кандидатурасын бірауыздан қолдады.
«Құрметті Ерлан Жақанұлы, сізді барлық делегаттар атынан AMANAT партиясының төрағасы болып сайлануыңызбен құттықтаймыз», — деді Асхат Оралов.
Айта кетейік, Президент Қасым-Жомарт Тоқаевтың төрағалығымен AMANAT партиясының съезі өтіп жатыр.
21 сәуірде партияның атқарушы хатшысы Асхат Оралов Президент осы жылдың 26 сәуірінде кезектен тыс XXIII Съезді шақыру туралы шешім қабылдағанын хабарлаған еді.
Оған барлық өңірлерден делегаттар қатысады. Съезд онлайн форматта өтеді. Съезд барысында «ADAL» саяси партиясының «AMANAT» партиясына қосылуы туралы мәселе қаралады деп жоспарланған.
Бұдан бұрын хабарланғандай, өткен аптада Мемлекет басшысы «Amanat» партиясының атқарушы хатшысы Асхат Ораловты қабылдады. Президенттің пікірінше, партияның аймақтық филиалдары осы мәселеде негізгі рөл атқаруға тиіс және өз деңгейінде мазмұнды қоғамдық диалогты нығайтуы қажет.
Биыл наурыз айында «ADAL» партиясының төрағасы Серік Сұлтанғали партияның AMANAT-қа қосылу шешімін түсіндірді.
ҚазАқпарат.
