Күні кеше Бәйдібек ауданының бірнеше азаматы марапат төрінен көрініп, жүректері қуаныштан лүпіл қақты. Тәуелсіздіктің 30 жылдығы мерекесі аталып өтіп, аймақтың дамуына үлес қосқандар алғыс арқалады. Салтанатты іс-шараға қатысқан аудан әкімі Ержігіт Шәріпбеков баршы жұртты егеменді еліміздің ерекше күнімен құттықтап, мерекелік лебізін білдірді.
Бүгінгі ұрпақ біздер жайнап, жадырап жүру үшін алдыңғы буынның өкілдері көп тер төкті. Бостандық үшін күрескен қаһармандар қаншама. Сол ерлік ескерілетін 16-желтоқсан әрбір Қазақстандықтардың ерекше датасы. Бойдағы патриоттық сезім күшейетін Тәуелсіздік мерекесі қарсаңында Бәйдібек ауданының тумалары Мемлекеттік наградаға қол жеткізді. Ерең еңбек ескеріліп, құрмет көрсетіліп, марапат берілді.
Сондай-ақ бұл күні отыздан аса азамат сахна төріне шығып, мәртебесі артты. Яғни, Бәйдібек ауданының әлеуметтік-экономикалық дамуына белсенді үлес қосып жүрген бірқатар азаматтарға Тәуелсіздіктің 30 жылдығына арналған мерекелік медаль табысталды. Және Құрмет грамоталары берілді. Президенттің Жарлығымен берілетін медаль талай жанның жүрегіне жылу сыйлады. 
Сонымен қатар шарада ауданның «Құрметті азаматы» атағы табысталды. Талай жылғы еңбегі барлар, туған жерді түлетуге үлес қосқан Бәйдібек ауданының тумалары зор қуанышқа кенелді.
Әр салада еңбек етіп жүрген азаматтарға жылдың үздіктері номинациясы табыс етілді. Ортасында ауданның атын шығарып жүрген жас бүлдіршіндер де бар. Тәуелсіздіктің 30 жылдығына орай ұйымдастырылған мерекелік іс-шара мәдениет үйі өнерпаздарының сахналық қойылымы мен мерекелік концертіне ұласты.
