«Азаматтарға арналған үкімет» мемлекеттік корпорациясы мүмкіндігі шектеулі жандарға мемлекеттік қызметтерді үйде отырып көрсетеді. Ол үшін 1414 бірыңғай байланыс орталығына қоңырау шалып, сұраныс қалдырсаңыз болғаны.
— 56 сағат ішінде ХҚО қызметкері өтініш берушімен хабарласып, клиентке ыңғайлы уақытта үйіне барады — деп атап өтті Айдос Ашетов «Азаматтарға арналған үкімет» мемлекеттік корпорациясы филиал директорының орынбасары. — Осы санаттағы адамдарға біз өз денсаулығымызға қауіп төндірмеуге және ХҚО-ға келмей, мемлекеттік қызметті үйден алу мүмкіндігін пайдалануға кеңес береміз. Олар ең танымал және сұранысқа ие қызметтерге қол жеткізе алады. Атап айтқанда, жеке куәлікті, сондай-ақ электрондық цифрлық қолтаңба алу.
Мемлекеттік корпорация қызметкерлері коронавирус індетін ескере отырып, қызмет көрсету барысында барлық қауіпсіздік шараларын сақтайды. Барлық маман маскаларын тағып, антисептиктермен жабдықталған.
«Азаматтарға арналған үкімет» мемлекеттік корпорациясы мүгедектерге мемлекеттік қызмет көрсету жұмысына көп көңіл бөледі. Азаматтардың үйлеріне барып мемлекеттік қызмет көрсетумен қатар, ХҚО мамандары есту және сөйлеу қабілеті нашар адамдарға мемлекеттік қызметтерді көрсету үшін ым-ишара тілін меңгергенін атап өту қажет.
Жыл басынан бері Шымкент қаласы бойынша филиалының қызметкерлері тұрғындардың үйіне барып, 1 мыңнан астам мемлекеттік қызмет көрсетті. Мемлекеттік қызметтерді үйде отырып І және ІІ топтағы мүгедектер, Ұлы Отан соғысының қатысушылары мен мүгедектігі бар балалар ала алады.
