«Құр сүлдесі қалған жылқыларды көргенде шыдап тұра алмадым». Қуаңшылыққа тап болған Маңғыстаулық ағайындарға қол ұшын созуды мақсат еткен Түркістандық Құрмет Талапқазы 200 мың дана мал азығын жіберуге ниетті. Алғаш жалғыз өзі шөп оруға кіріссе, қазіргі таңда еліміздің түкпір-түкпірінен игі іске ат салысқысы келген азаматтар келіп қол ұшын созуда. Тек мал азығы ғана емес, жаны жомарт жандардан келіп түскен ақшалай көмектерді де үлестіреміз дейді.
Әлеуметтік желілердегі төрт түліктің төресі саналған жылқылардың аянышты халі жаныңды бей-жай қалдырмайды. Көптің көңілін жабырқатқан Маңғыстаудағы қуаңшылыққа қатысты түрлі пікірлер айтылуда. Дегенмен сөзден қарағанда іске көшкен Түркістандық 25 жасар Құрмет Талапқазы бірнеше апта бұрын қолына шалғысын алып, шөп оруға кіріскен. Теңізге тамған тамшыдай болсын үлес қосуға ниеттенген жаны жомарт азамат бүгінде мал азығының алғашқы бөлігін жіберуге дайын.
Қазіргі таңда тек қолға ілінгендерін орып дайындаса, алдағы уақытта қамыстардан мал азығын жасап шығаруға ниетті. Алайда әліде болсын азаматтардың жұмыс күші қажет. Жұмыла көтерген жүк жеңіл дегендей қуаңшылыққа тап болған аймақтарға көмек беру үшін барша Қазақстандықтар бес саусақтай бірігіп, игі істің басы қасынан табылса нұр үстіне нұр болар еді дейді.
Құрметтің құрметке тұрарлық ісін құптағандар еліміздің түкпір түкпірінен келіп өз үлестерін қосуда. Мәселен Талдықорғандық Мұрат Солтанбай аурухана төсегінен жаңа шыққанына қарамастан игі істің жанынан табылуға арнайы келіпті.
