ШЫМКЕНТ ҚАЛАСЫНЫҢ БЮДЖЕТІНДЕ ӨЗГЕРІС

Шаһардың 2021-2025 жылдарға арналған қаражаты қайта қаралып, депутаттардың назарына ұсынылды, деп хабарлайды Айғақ-ақпарат.

Даму бағарламасы аясында мегаполис тұрғындарын баспанамен қамту, жолдарды ретке келтіру секілді мәселелер жоспарға қойылып отыр. Бұл туралы тұрақты комиссия отырысында қаралып, алтыншы сессияда талқыланды.
Халық қалаулылары бас қосқан жиында алдымен халықтың әлеуметтік осал топтарын қолдау және оңалту шаралары, жолаушылар көлігі және автомобиль жолдары басқармасының, қала тұрғындарын баспанамен қамту шараларының есебі тыңдалды. Аталған мәселелердің бәрі де тұрақты комиссияларда егжей-тегжейлі қаралған. Солардың бірегейі — баспана. Шымкент миллионды қала атанғалы тұрғын үйге сұраныс артып келеді. Қазіргі таңда 44 мың адам үй кезегінде тұр. Оның ішінде көпбалалы отбасылар мен әлеуметтік осал топтың баспаналы болуы алаңдатады. Тұрғын үй басқармасының басшысы Азамат Рысжановтың айтуынша 976 отбасыны арендалық пәтермен қамту жоспарланған. Бүгінгі таңда құрылыс басқармасы тарапынан 696 пәтер пайдалануға тапсырылып, оның ішінде 300 пәтері жұмыс істейтін жастарға табыс етілді. 308 пәтер бойынша тұрғын үй комиссияның шешімі қабылданып, жалдау шарттарын беру толығымен аяқталып, азаматтарға кезек реті бойынша берілді. Ал жыл соңына дейін 368 отбасы жаладамалы баспанаға қол жеткізеді дейді.
Күн тәртібінде автомобиль жолдары бойынша да мәселелер қаралды. Биыл үшінші мегаполисте ішкі орам жолдары мен шалғай елдімекендердің көшелеріне басымдық беріліп отыр. Құрылыс және орташа жөндеу жұмыстары сол жерлерде көптеп жүргізілуде. Бүгінгі таңда атқарылып жатқан маңызды жұмыстардың бірі – шағалтас төсеу. Қазір жалпы ұзындығы 153 шақырымды құрайтын көшелерге шағалтас төселуде. Оның басым көпшілігі Қаратау ауданының еншісінде. Себебі, осы ауданда жаңадан қалыптасып келе жатқан елдімекендер мен шағынаудандар көп. Осыған орай қосымша қаржы бөлуге бюджеттік өтінім жолданған болатын. Қалалық мәслихаттың сессиясында ол мақұлданып, 500 млн қаржы бөлінді. Осылайша биыл топырақ жолдардың мәселесі біршама шешімін таппақ.
Еліміздің даму стратегиясында халықтың әлеуметтік жағынан осал топтарын қорғау басым бағыттардың бірі ретінде қарастырылған. Ал әлеуметтік сала қоғам өмірінде басты рөл атқарады. Сол себепті қоғамның әлсіз тұсына баса көңіл бөлініп келеді. Сондай-ақ мемлекетпен кепілдендірілген төлемдер көлемі жыл сайын көтерілуде және жергілікті бюджет қаржысы есебінен де түрлі әлеуметтік қолдаулар ұйымдастырылып келеді. Бүгінде Шымкент қаласында 82 мың ардагер бар. Оларды сауықтыру мәселелеріне де ерекше мән берілуде. Атап айтқанда, осы жылы 1000 ардагерге санаторийде емделуге жолдама тапсырылған. Шымкент қаласы жұмыспен қамту және әлеуметтік қорғау басқармасы басшысының міндетін атқарушы Ерман Бекмұратовтың айтуынша, «Еңбек» мемлекеттік бағдарламасы аясында 2021 жылдың бірінші тоқсандағы жағдай бойынша 229 мүмкіндігі шектеулі азамат әлеуметтік қолдау шараларымен қамтылған. Оның ішінде 62 азамат тұрақты жұмысқа, ал 167 азамат уақытша жұмысқа тартылған.
Бюджетті нақтылау барысында қаржы негізінен қаланың әлеуметтік-экономикалық дамуына оң әсер ететін, тұрғындарды толғандыратын мәселелерін шешуге бағытталды. Әкім Әйтеновтың айтуынша шаһардың инженерлік-инфрақұрылымдық жүйесін дамытуға басымдық берілуде. Сонымен қатар, көпқабатты тұрғын үй, аулаларды абаттандыру, бұқаралық спортты дамыту мақсатында шағынаудандарда әмбебап спорт алаңдарын орнату жоспарланды.
Бірқатар мәселелер талқыланған сессия отырысында төраға ауысты. Депутат Альбина Елшиеваның орнына жетінші шақырылымдағы мәслихаты сессиясының кезекті отырысының төрағалығына Төреайым Сұлтанова сайланды. Осылай деп қорытындылаған шаһар басшысы Мұрат Әйтенов жыл басынан бері қаланың негізгі көрсеткіштерінде оң өсім барын айтып, жұмыстарды одан әрі күшейту қажеттігін айтты.