Ауыл шаруашылығына бейім Шардара ауданында биыл 11 мың гектарға жуық алқапқа бақша дақылдары егілген. Ерте көктемнен егін қамына кіріскен шаруалардың еселі еңбектері арқасында бүгінде Шардараның ерте піскен алғашқы қарбыздары сатылымға шығарылмақ. Айталық жергілікті жердегі «Тұрар» шаруа қожалығы енді екі-үш күн ішінде қарбыз өнімдерін жинау маусымына кірісіп, алғашқы партияны Белорусия еліне экспорттауды жоспарлап отыр. Шаруашылық төрағасының айтуынша Шардараның шырынды қарбыздарына нарықта сұраныс аз емес. Сондықтан өнімді сатуға келгенде мәселе туындамайды. Осылай деген шаруашылық жетекшісі Юрий Ан 15 гектар бақша алқабының әр гектарынан орта есеппен 40 тоннадан қарбыз жинауды жоспарлап отыр.
Айта кетсек дәл қазір ерте піскен қарбыз өнімінің әр келісі 170 теңгені құрайды. Егін шаруашылығына тың технологияларды қолдану арқылы бірнеше жылдан бері пияздың Голландиялық сортын өсіріп келе жатқан «Тұрар» шаруа қожалығы бұл дақыл түрін толығымен тамшылатып суару жүйесіне қосқан. Нәтижесінде биыл 45 гектарға егілген «бонус» сортты пияздың әр гектарынан 100 тоннаға жуық өнім алынады деп жоспарлануда.
Сонымен бірге аталмыш шаруашылық алдағы жылдары қарбыздың жаңа сортын өсіріп сатылымға шығармақ. Яғни Еуропа нарығында аса сұранысқа ие ішінде дәні жоқ қарбыз алдағы уақытта Шардара ауданында да өсіріле бастайды.
aigak.kz
