ҚАЗАҚСТАНДЫҚ АТҚЫШТАР ТАҒЫ БІР ОЛИМПИАДАЛЫҚ ЛИЦЕНЗИЯ ЖЕҢІП АЛДЫ!

 Бүгінгі таңда қазақстандық атқыштарда 3 олимпиадалық лицензия бар!

Стенд атудан Еуропа чемпионатынан кейін рейтинг бойынша Халықаралық спорттық ату федерациясы (ISSF) бірқатар қосымша лицензиялар бөлді.

Рейтинг бойынша қосымша лицензия шымкенттік спортшы, стенд ату бойынша Қазақстан Республикасының халықаралық дәрежедегі спорт шебері, Азия Чемпионатының екі дүркін жүлдегері, Дүниежүзілік жазғы Универсиаданың күміс жүлдегері, Әлем Кубогының күміс жүлдегері (Үндістан), Әлем кубогының командалық есепте чемпионы (Үндістан) — Зоя Алексеевна Кравченкоға берілді!
Жыл басынан бері қазақстандық атқыштар Әлем кубогы мен Азия чемпионаты кезеңдерінде халықаралық аренада ең жоғары нәтижелерді көрсетті, 10 медаль, оның ішінде 2 алтын, 4 күміс, 4 қола медаль жеңіп алды.

Кравченко Зоя Үндістандағы Әлем Кубогында үлкен нәтиже көрсетті, жеке есепте күміс медальға ие болды және командалық есепте «skeet» жаттығуында алтын медальға ие болды.

Қосымша олимпиадалық лицензиялар 2021 жылдың 7 маусымына дейін бөлінеді. Барлық лицензияларды бөлгеннен кейін, Спорттық ату түрлерінен Қазақстан Федерациясы (САҚФ) XXXII жазғы Олимпиада ойындарына қатысатын спортшылардың құрамын жариялайды.
XXXII жазғы Олимпиада ойындары ағымдағы жылғы 23 шілде мен 8 тамыз аралығында Токио қаласында (Жапония) өтеді.

Естеріңізге сала кетейік, бұған дейін қазақстандық атқыштардың 2019 жылы Катарда өткен 14-Азия чемпионатында жеңіп алған 2 олимпиадалық лицензиясы болған, олардың иегерлері Рысбекова Сәрсенкүл (стенд ату) және Юрий Юрков (оқ ату), спортшылар үшінші мегаполис, яғни Шымкент қаласының өкілдері болып табылады.