ЖАҢА МӘДЕНИЕТ ҮЙІНІҢ ҚАЗЫҒЫ ҚАҒЫЛДЫ

«Қазақстан халықтарының бірлігі күні» мерекесінде Абай ауданына қарасты Карл Маркс елді мекенінде жаңа мәдениет үйінің қазығы қағылды, деп хабарлайды Айғақ-ақпарат.

Ал бұл игі бастаманы қолға алған жергілікті жердегі Түрік-Әзірбайжан ұлтының белсенді азаматтары ғимарат құрылысын толықтай өз қаражаттары есебінен салып беретін болады. Мәдениет үйін «Тәуелсіздіктің 30 жылдығы» деп атап қысқа уақыт ішінде құрылысын аяқтауды жоспарлап отырған жергілікті тұрғындардың белсенді әрекетіне Шымкент қаласы әкімінің бірінші орынбасары Шыңғыс Мұқан шынайы алғысын білдірді.
Бірлік бар жерде тірлік бар. Бұл тұрғыда біздің ең басты байлығымыз — берекелі бірлігіміз болып табылады. Ал 1- Мамыр сол татулықты бекем еткен айтулы мереке.
Бүгінде Шымкент қаласында тату-тәтті ғұмыр кешіп жатқан этностар арасында ешқандай келіспеушілік, алауыздық жоқ. Олар Қазақстанды ортақ отанымыз деп санайды. Сондықтан игі бастаманы жүзеге асырып жатқан Карл Маркс елді мекені тұрғындарымен кездесу барысында қала әкімінің бірінші орынбасары белсенділігімен көзге түсіп жүрген бірқатар жергілікті азаматтарға алғыс хаттар табыс етті.
Абай ауданында жеке инвестор есебінен жүзеге асырылып жатқан жобаның тағы бірі нақ осы Карл Маркс елді мекеніннің аумағы арқылы өткен «Бадам өзенін абаттандыру жұмысы. Бұған дейін өзен жағалауындағы тұрмыстық қалдықтар мен күл қоқысқа толып жатқан бөлікті жуырда жеке кәсіпкер азамат өз қарауына алып бүгінде қарқынды жұмысқа кіріскен. Ең бастысы өзен жағалауынан спорт алаңшалары мен демалыс орнын салып айналасын жасыл желекке айналдыруды жоспарлап отырған инвестор бұл жобаға 60 млн теңгеге жуық қаржы жұмсайтын болады. Осылай деген Абай ауданының әкімі Бұхарбай Пармановтың айтуынша бүгінде Бадам өзенінің айналасын абаттандырып демалыс орындарын ашуға ниет танытушылар қатары артып келеді екен.
Міне осындай жобалар нәтижесінде Бадам өзенінің аумағындағы қараусыз жатқан бөліктерді де абаттандырып көркейтуге мүмкіндік туатындығын айтқан аудан басшысы бұл бағыттағы жұмыстардың жалғаса беретіндігін жеткізді.