Шымкентте «Қанымыз бірге» акциясы аясында 30-ға жуық этнос өкілі донор болды. Аталған акция 1-наурыз – «Алғыс айту» күніне орай ұйымдастырылды.
Еріктілер, ең алдымен, қалалық қан тапсыру орталығына барып, арнайы тексерістен өтті. Онда азаматтардың бойы мен салмағы, қан қысымы және басқа да ауруларының бар-жоғы тексерілді.Тексерістен өткен азаматтардан белгілі мөлшерде қан алынды. Содан кейін азаматтар 30 минут дәрігерлердің бақылауында болып, үйлеріне қайтты.
Бұл шара – Тәуелсіздіктің 30 жылдығына арналған «30 қайырымды іс» марафонының алғашқысы. Жыл соңына дейін этнос өкілдері жақсылық жасап, мұқтаж адамдарға қолдан келген көмектерін береді. Бүгінде Шымкент қаласында 100-ден астам этнос өкілдері тату-тәтті өмір сүруде. 16 этномәдени бірлестік елдің бірлігін бекемдеп, ырысты ынтымағын арттыру бағытында табысты жұмыстар жүргізіп келеді.
Шымкент қаласының Ақпараттық-коммуникациялық орталығы