Жауынгердің ерлігі ескерілді

     65/06 әскери бөлімінің жауынгері Артем Калашников «Қоғамдық  тәртіпті сақтауға қосқан үлесі үшін» медалімен, «Қоғамдық тәртіпті сақтағаны үшін» Ұлттық Ұлан кеуде белгісімен марапатталды. Бұған себеп, қала тұрғынын зорлықтан құтқарып қалуы.      Ақпанның  13-і, түнгі 00:40 шамасында үйіне келе жатып, көше бойында айқайлап  көмек сұрап жатқан бойжеткеннің дауысын естіп, қатардағы жауынгер Калашников бірден сол жаққа қарай беттейді. Дер кезде көмекке келуінің  арқасында зорлық іске жол бермек болған 2 азаматты тоқтатып, тиісті мекемеге хабарласқан.

      Артем Калашниковтан сол кездегі жағдайды сипаттап беруін өтініп едік:  «Мен болған оқиға жөнінде ерлік жасадым деп ойламаймын. Бұл кез келген әскери адамның, тіпті жай адамның міндеті. Біздің әскери міндетіміз – қоғамдық тәртіпті қадағалау. Үйге келе жатып қыздың айқайлаған дауысын естідім. Шамамен 50 метрдей жерден шыққан дауыс жаққа қарай жүгірдім. Екі ер адам қызға тиісіп жатыр екен. Біреуін ұстап алдым, ал екіншісі қашып кетті. 102-ге хабарласып, полицейлерді шақырдым. Кейіннен қыздың ата-анасы маған алғысын білдірді»,-деп ойын аяқтады.     Иә, оқиға осылай болған. Осыдан кейін Артемның ерлігі ІІМ мен Ұлттық Ұлан Басқолбасшылығына марапатқа ұсынылған болатын. Нәтижесінде 65/06 әскери бөлімінің алаңында Артем Калашниковты салтанатты құттықтау шарасы өтті.                                                                      Айта кетейік, Артем Романұлы 1997 жылы Шымкент қаласында дүниеге келген. Мектеп кезінде әскери-патриоттық «Жас бүркіт» клубына қатысып, жоғары оқу орнын өңірлік Халықтар достығы университетінде тәмамдаған. Ішкі істер министрі тарапынан «Қоғамдық тәртіпті сақтаудағы қосқан үлесі үшін» медалін ҚР ҰҰ Оңтүстік өңірлік қолбасшылығының  қолбасшысы, генерал-майор Талапкер Қыдырұлы табыстады.

    Артем Калашников: «Өкінішке қарай бүгінгі күнде құқық бұзушы жеке тұлғалар бар екенін атап өткім келеді. Бірақ, бізде көп жақсы адамдар, соның ішінде Ұлттық Ұланның әскери қызметкерлері өзінің өмірін тәуекелге тігіп, кез келген жағдайда көмек береді. Күн сайын өздеріне берілген тапсырманы мүлтіксіз орындайды. Біреуді судан, біреуді оттан құтқару соның бір дәлелі. Және бұл бір ғана жағдай емес екендігін айтқым келеді. Қатардағы жауынгер Калашников үйінде болса да, еңбек демалысында болса да өзіне тиесілі жұмыс болсын, болмасын белсене кірісіп кетеді. Мен құқық бұзушы адамдарға, әскери қызметкерлердің күші, қолдауы, көмегі бар жерде бәрін жеңетіндігімізді айтқым келеді. Осындай әскери қызметкерлерді мақтан етемін!» «Адал ұл ер боп туса – ел тілегі». Бойжеткенді құтқарып, елдің алғысын алған жауынгердің  еңбегі ескерілді. Көпке үлгі болды. Бұл ретте әскери бөлімнің  тәрбиесін де айтуға болады. Әскери өмір – ерлік жасайтын, батыл шешімдер қабылдайтын нағыз азаматтарды тәрбиелейді. Айғақ-ақпарат