Түркістан облысының бас мемлекеттік санитарлық дәрігерінің оң шешіміне сәйкес, 4 ақпаннан бастап ауыл мешіттерінде жұма намазы оқыла бастады. Бұл туралы ҚМДБ Түркістан облысы бойынша өкіл имамы Еркебұлан Қарақұлов баспасөз жиынында мәлім етті. Облыс имамының айтуынша, ең бастысы тиісті талаптарды орындай отырып, мешіттердің сыйымдылығын 30%-дан асырмау қажет. Сонымен бірге құлшылық кезіндегі мешіттерде жүзеге асатын санитарлық іс-шаралар тәртібі мен ережелер басты назарда болуы тиіс деді. Бұдан өзге Еркебұлан Ибрайымұлы ІV-республикалық имамдар форумында қабылданған жаңа бастамаларға да тоқталып өтті. Аталмыш форумда «Зияткер имам», «Зират салу, Зиярат әдебі», «Дастархан жаю әдебі» сияқты маңызды құжаттар қабылданған. Соның негізінде облыста жоспар түзіліп, тиісті жұмыстар қолға алынуда.
Сондай-ақ, ҚМДБ Төралқа мәжілісінде 7 түрлі бағыт бекітілген. Яғни, бұрын имамдар төрт бағыт бойынша жұмыс істейтін болса, енді олардың саны жетеуге жетіп отыр. Оған қоса өңірде діни оңалту бойынша «мобильді топ» құрылған. Оның мақсаты облысымыздағы жат ағымның жетегінде жүрген азаматтарға білікті имамдар арқылы жүргізілетін ақпараттық түсіндірме жұмыстарын жандандыру болып табылады. Зияткерлік заман талабы болғандықтан имамдарды жан-жақты білімді әрі білікті ету шаралары қабылданған.
Бұқарамен байланыс орнату үшін онлайн уағыз, тұрақты діни дәрістер, рухани кездесулер, сұрақ-жауап сұхбаттары өткізіліп келеді. Енді ихсан ілімін насихаттау қолға алынды. Яки, адамгершілік, адами қарым-қатынас, әрекет, сыйластық, ұлттық тәрбиедегі қазақы құндылықтар насихатталады.