Шымкент қаласында өрт гидранттарының кейбірі асфальт астында көміліп қалса, енді бірінің бұранғылары істен шыққан. Осындай олқылықтардың әсерінен Төтенше жағдай қызметкерлері тілсіз жауды сөндіру кезінде су тапшылығына жиі кезігеді. Осы мәселені шешу мақсатында Департамент қызметкерлері жауапты мамандардың қатысуымен жиын өткізді.
Жаман айтпай, жақсы жоқ. Дегенмен, зәулім ғимараттың бірі қызыл жалынға оранды делік. Өрт сөндіру қызметкерлері дәл уақытында сол жерге жетті. Тілсіз жаумен күресу үстінде судың тапшылығы орын алады. Сол сәтте жақын маңдағы өрт гидранттарынан қосымша су алып, отты жалынның одан әрі өршіп кетпеуінің алдын алу жауапты мамандардың міндеті. Бірақ, үшінші мегаполисте өрт гидранттарының біршамасы жарамсыз күйде қалған.
Шымкент қаласының көше бойларында жалпы 3715 өрт гидранты есепке алынған. Былтыр қазан-желтоқсан айларында жүргізілген тексеріс жұмыстарының нәтижесінде 1087 өрт гидранты жарамсыз деп танылып отыр. Төтенше жағдайлар басқармасы қызметкерлерінің тексеруі бойынша оның 161-і асфальт астында көміліп кеткен. Қалған құрылғылардың тозығы жетіп, кесіп тасталынған. Одан да басқа түрлі себептер бар. Дәл осындай кемшіліктердің әсерінен өрт сөндіру тұсында жүйелі жұмыстар атқарылмай жатады.
Өртті дер кезінде сөндіру – ең бастысы адам өмірін өлімнен арашалап, құнды заттарды аман алып қалуға және өрттің одан әрі өршуіне жол бермеуге септігін тигізеді. Сондықтан қала аумағында орналасқан өрт гидранттарының техникалық жағдайына жайбарақат қарамаған жөн.