Қазақстанда алғаш рет халықты жұмыспен қамту орталығының жұмысын бақылайтын бірегей жүйе іске қосылды

Өңір басшысы Өмірзақ Естайұлының тапсырмасымен Түркістан қаласында орналасқан «Халықты жұмыспен қамту орталығы» қызметкерлерінің алдына бейнекамералар орнатылды. Орталықта 18 бейнекамера дауыс жазу құралымен қабылдау бөліміне қойылған болса, 10 бейнебақылау камераға зияткерлік талдау жүйесі қойылды. Заманауи бейнебақылау жүйесі арқылы қызмет алушы мен қызмет беруші арасындағы сұқбат онлайн режимде http://www.turkistan2020.kz сайтында жүргізілетін болады. Әңгіменің жазылатыны және онлайн форматта кез келген азаматтың көре алатыны жайында қызмет алушы алдын ала ескертіліп, рұқсаты алынады. Сонымен қатар, алдағы уақытта жұмыс барысы «Amazing Turkistan» мобильді қосымшасына біріктіріліп, қолданушыларға да көруге мүмкіндік беріледі. Аталмыш жүйе қамтитын басты мүмкіндіктер:
— келуші санын санау аналитикасы,
— бір жерде көп шоғырланған адамдарды іздеу аналитикасы,
— қызметкердің жұмыс тиімділігін санау аналитикасы,
— кезек детекторы,
— саботаж детекторы (камера жұмысы тоқтатылған бойда арнайы телеграм-ботқа хабарлама жіберіледі).
Барлық мәліметтер Түркістан қаласы «109 — Бірыңғай байланыс орталығында» арнайы телеграм-боты арқылы жинақталып, сараптамалық жұмыстар атқарылады. Әр қызметкердің жұмыс сапасы анықталып, көрсеткіштерге сай орталық жұмысының тиімділігін арттыру жолдары ұсынылатын болады.
Жүйенің басты мақсаттары:
— тұрғындардың қызмет алу жайлылығын арттыру
— жемқорлық орын алу мүмкіндігін азайту
— қызметкерлердің өз жұмыс сапасын көрсетуіне мүмкіндік беру
— карантин кезеңінде халық денсаулығын қору жолдарын қамтамасыз ету.

Анықтама:
І.Түркістан қаласы «Халықты жұмыспен қамту орталығында» 2 ауысыммен 18 қызметкер жұмыс атқарады. Әдеттегі күнделікті қабылдау қабілеттілігі 120 тұрғын, карантин кезеңінде 45 тұрғын. мемлекеттік 8 қызмет түрі көрсетіледі. Атап айтқанда:

Ең көп сұранысқа ие қызмет түрлері: халықты жұмыспен қамту шараларына жолдама беру бойынша тұрақты жұмыс, қоғамдық жұмыс, жастар практикасы, атаулы әлеуметтік көмек.
Бұл қызметтердің ішінде 5 (сан) түрі Еnbek.kz сайты арқылы (пилоттық аймақтарда):
1. Жұмыссыз ретінде тіркелу;
2. Лайықты бос жұмыс орындарын іздестіру және жұмысқа орналасуға жәрдемдесу;
3. Әлеуметтік жұмыс орындары;
4. Қоғамдық жұмыстар;
5. Жастар практикасы онлайн түрде көрсетіледі.

3 қызмет түрі egov.kz порталы арқылы, атап айтқанда:
1. Жұмыс іздеуші ретінде тіркелу
2. Атаулы әлеуметтік көмек
3. Жұмысынан айырылған жағдайда төленетін әлеуметтік көмектер

Денсаулық жағдайына немесе ерекше қажеттілігі бар кісіге күтім жасауына байланысты орталыққа келе алмайтын тұрғындар 4-09-03, 8-771-018-95-61, 8-705-367-69-79 арқылы байланысқа шығып, онлайн көрсетілмейтін қызметтерді үй-жайында алуға тапсырыс бере алады.

Түркістан қаласы әкімінің баспасөз қызметі