Жыл басынан бері көпбалалы аналар 171,2 миллиард теңге көлемінде жәрдемақы алды, — деп хабарлайды Еңбек және халықты әлеуметтік қорғау министрлігі.
Ведомство мәліметінше, 2020 жылғы қаңтар-қыркүйек аралығында жалпы сомасы 171,2 миллиард теңгеге 386,6 мың отбасы көпбалалы отбасыларға арналған мемлекеттік жәрдемақымен қамтылды. Қыркүйек айында осы жәрдемақы түрін жалпы сомасы 17,9 миллиард теңгеге 359,6 мың отбасы алды.
«Аталған мемлекеттік жәрдемақыға 4 және одан көп бірге тұратын кәмелетке толмаған немесе күндізгі бөлімде оқитын 23 жасқа дейінгі студент балалары бар отбасылар табысына қарамастан үміткер бола алады. Төлем мөлшері балалардың санына байланысты 44 532 теңгеден (4 бала) 77 951 теңгеге (7 бала) дейін, 8 және одан кейінгі әр балаға 4 АЕК-тен сараланған.
Осылайша, осы жәрдемақының ұлғаюы 8 және одан да көп баласы бар отбасылар үшін жеке мөлшерді белгілеу арқылы қамтамасыз етілді. Тиісті заңға Мемлекет басшысы ағымдағы жылғы 13 мамырда қол қойды», — делінген хабарламада.
8 баласы бар отбасы үшін жәрдемақы — 88 896 теңге, 9 балаға – 100 008 теңге, 10 – 111 120 теңге, 11 — 122 232 теңге, 12 – 133 344 теңге, 13 – 144 456 теңге, 14 – 155 568 теңге, 15 — 166 680 теңге, 16 – 177 792 теңге төленеді.
Заң 2020 жылдың 1 қаңтарынан бастап күшіне енді, осыған байланысты 8 және одан көп баласы бар көпбалалы отбасыларға берілетін жәрдемақы мөлшері тағайындалған кезден бастап қайта есептелді. Сонымен, ағымдағы жылдың шілде айында аталған отбасылар жаңа мөлшерде жәрдемақыны, сондай-ақ қаңтар-маусым айларында қалыптасқан айырманы алды.
Министрлік мәліметінше, 2020 жылы көпбалалы отбасыларға мемлекеттік жәрдемақы төлеуге республикалық бюджеттен 191,1 миллиард теңге қарастырылған.
