Қазақстан өңірлерінде автожолдардың 4 мыңнан астам шақырымы жөнделеді

Елімізде биыл жергілікті жол желісін дамытуға 262 млрд теңге қарастырылған. Бұл қаражат автомобиль жолдарының 4,3 мың шақырымын жөндеу жұмыстарымен қамтуға жұмсалмақ.

 Республикалық маңызға ие жолдардың жағдайын жақсартумен қатар, Қазақстан Республикасының  Индустрия және инфрақұрылымдық даму министрлігі жергілікті атқарушы органдар – әкімдіктерге де қолдау көрсетеді.

Облыстық және аудандық маңызы бар автожолдарды дамытуға 2020 жылы 208 млрд теңге бағытталса, оның 115 млрд теңгесі республикалық бюджеттен, 93 млрд теңгесі жергілікті бюджеттен бөлінбек.

Нұр-Сұлтан, Алматы және Шымкент қалаларының көше желісін дамытуға 50,2 млрд теңге бөлінсе, 4,1 млрд теңгеге елорда мен Алматы қаласы маңындағы жер телімдері сатылып алынады.

Жалпылай алғанда, 350 жоба іске асырылмақ.

Осылайша, жыл қорытындысы бойынша жергілікті жол желісінің сапасын  75% дейін жеткізу жоспарланған. Өткен жылы бұл көрсеткіш 71% құраған еді.

2019 жылы жөндеу жұмыстарымен қамтылған жергілікті жолдардың жалпы ұзындығы 4 617 шақырымды құрады. 386 жоба іске асырылды. Жалпы жергілікті жол желісін дамытуға 260,7 млрд теңге, соның ішінде облыстық және аудандық маңызға ие жолдарды дамытуға 203 млрд теңге, Нұр-Сұлтан, Алматы және Шымкент қалаларының көше желісін дамытуға 57,7 млрд теңге бөлінген болатын.

Еске сала кетейік, Қазақстандағы облыстық және аудандық маңызы бар жолдардың жалпы ұзындығы 70,9 мың шақырымды құрайды. Жөндеу жұмыстары жоспарға сәйкес қарқынмен жүзеге асырылған жағдайда жақсы және қанағаттандырарлық жағдайдағы жергілікті жолдар желісінің үлесі 2025 жылға қарай 95% дейін жеткізіледі.