Түркістан облысының әкімі Өмірзақ Шөкеев аудан-қала әкімдерінің жылдық есебіне ескертусіз келіп қатысатынын ескерткен болатын. Аймақ басшысы Сарыағаш ауданы әкімінің есептік жиынына ескертусіз келіп, қатысты. Өңір басшысы келгенде аудан әкімі Мұхит Отаршиев жергілікті халықтың сауалдарына жауап беріп жатқан. Күтпеген кездесуге куә болған тұрғындардың кейбірі ұсыныс-пікірлерін Өмірзақ Шөкеевтің өзіне әкеліп тапсырды. Ауданда атқарылған жұмыстарды баяндаған аудан басшысы әлеуметтік-экономикалық даму жағынан жақсы көрсеткіштерге қол жеткізіліп, барлық салада өсу байқалатынын атап өтті, — деп хабарлайды Түркістан облысы әкімінің баспасөз қызметі .
«Әсіресе ауыл шаруашылығы мен туризм, құрылыс салалаларында жоспарланған жұмыстар қарқынды жүргізілуде. 2020 жылы 30 әлеуметтік нысанның құрылысын жүргізу жоспарланып, бюджеттің кіріс бөлігі 102,7%-ға орындалған. Ауыл шаруашылығы өнімінің көлемін 2020 жылы 80 млрд теңгеге жеткізу жоспарлануда. Аудандағы шағын несие ұйымдары тарапынан барлығы 5057 адамға 4,7 млрд теңге көлемінде несиелер беріліп, нәтижесінде 6340 жұмыс орны ашылған. 2019 жылы ауданға 38,8 млрд теңгенің инвестициясы тартылған», — деді халыққа есеп берген Мұхит Отаршиев.
Аудан әкімінің сөзінше, «Халық үніне құлақ асатын мемлекет» тұжырымдамасы – бұл ел Президенті Қасым-Жомарт Тоқаевтың Қазақстан халқына арнаған Жолдауына арқау болған бағыттардың бірі саналады. Биылғы әкімдердің халық алдында есеп беруі — мемлекет тұжырымдамасының мүлтіксіз орындалуының айғағы. Қорытынды есепке дейін барлық елдімекен тұрғындарын аралап шыққанын және тұрғындарды жеке мәселелері бойынша қабылдағанын жеткізді.
