Есептік кездесуде тұрғындар әкімге емес, учаскелік полиция қызметкерлеріне көп сын айтып жүр. Мәселен, Шымкенттегі Әл-Фараби ауданында өткен жиында тұрғындар құқық қорғау саласындағы қызметкерлердің жұмысына көңілі толмай отырды. Ашылмай қалатын ұрлыққа, тал түсте болатын қылмысқа учаскелік полициясын танымай жүрген тұрғындар өкпесін айтты.
218 865 тұрғыны бар Әл-Фараби ауданы мегаполистің ортасында орналасқан. Көп қабатты баспанасы басымырақ. Сондықтан, өзге аудандарға қарағанда мәселесі де жинақы. Ең атақты ғұлама ғалымның есімін иеленген Әл-Фараби аймағын Созақ ауданының тумасы Ғабит Мәуленқұлов басқарып отыр. Бұған дейін Қаратау ауданында әкім, қала әкімінің орынбасары болған бұл азамат функционалдық міндетін жақсы білетіні байқалып тұр. Жарты сағатқа созылған баяндамасында құзыретіне кіретін тірліктерді тізіп беріп, тұрғындар көтерген сұрақтарға сенімді түрде жауап берді.
Әкімнің есептік кездесуінде сұрақтың көпшілігі полиция қызметкерлеріне тікелей қатысты болды. Қауіпсіздікті қадағалайтын қорғаушыларымыз көзден таса болып жүрген сияқты. Әншейінде, дыбысты сигналымен үркітіп жүретіндер, керек кезде жым-жырт жоқ болады. Ашығын айтқанда, кейбір қылмыстар «жабулы қазан, жабулы күйінде» қалып жатыр. Осындай мәселелерден ыза болған тұрғындар ең болмағанда мемлекеттің мүлкін қорғаса екен дейді. Бюджеттің ақшасына жасалған тірлікке жаны ашымайтын безбүйректерді қолға түсіретін бейнебақылау камерасын көбейту керек.
Әл-Фараби ауданының әкімдігі соңғы уақытта әлеуметтік желіде белсенділігін арттырған. Фейзбук, инстаграм парақшаларында көгалдандыру жұмыстарына көңіл бөліп, қала тұрғындарын тазалыққа шақырып жүр. Мамандығы заңгер әкім Ғабит Мәуленқұлов барын бар деп мақтанды, жоғын жоқ деп қымсынды. Мұнда учаскелік полиция қызметкерлерінің жұмысына қатысты өкпе-назға жауапты басшылары ләм-мим демей, үнсіз ғана сытылды.
Ашылмайтын ұрлық жоқ, аша алмайтын полиция бар. Бірақ, кейде амалсыз тілімізді тістейміз. Түбінде қарапайым халық сорлайды. Бұрын прокуратурада жұмыс істеген Ғабит Патшаханұлы көтерілген сұрақтардың орынды екенін сезіп тұрған болар, тұрғындарға қолдау білдірді. Әкімнің жұмысы бюджеттің қаржысына жасалып жатқан тірлікпен мақтанып, соның аясындағы ғана жұмыспен әдемі есеп беріп құтылмау керек. Инвестиция тартып, өзге де іс-шараларды ұйымдастыра білу міндеті.
Осындай кездесулерге қалалық мәслихаттың депутаттары қатысып тұруы қажет. Халық қалаулыларына айтарымыз тек қаланың әкімі жүрген іс-шаралардан ғана көрінбей, бір кездері дауыс беріп сайлаған сайлаушыларыңызға жақын болсаңыздар екен. Өтер іс өтті, іс бітті, қу кетті деген әдеттен арылу керек.
