Ерлік жасаған түркістандық полицей Ақорданың төрінде марапатталды

«Ердің ерлігі — ел есінде» демекші, киелі өңір Түркістан облысында ерлік және батырлық әрекеттерімен халықтың алғысына бөленіп жүрген тәртіп сақшылары қаншама десеңші. Солардың бірі, бүгінде Түркістан облысы Полиция департаментіне қарасты Отырар аудандық полиция бөлімінде қызмет етіп келеді. Ол полиция аға сержанты Рақымжан Ниязбекұлы. Рақымжан осы жылдың Тәуелсіздік мерекесі қарсаңында Мемлекет басшысы Қ.Тоқаевтың Жарлығымен Ақорданың төрінде «Ерлігі үшін» медалін алып, кеудесін алғашқы төсбелгісімен толықтырды. «Ерлігі үшін» медалі нағыз ерлік көрсеткендерге ғана берілетін мемлекеттік марапат. Сондықтан ерлігімен көзге түскен жас полицей Рақымжан осылайша өз  қатарластарына үлгі-өнеге көрсетті, деп хабарлайды Түркістан облысы Полиция Департаментінің баспасөз қызметі

Сіздерге түсінікті болу үшін батыр полицейдің оқиғасын баяндайын. Ағымдағы жылдың сәуір айының соңында Отырар ауданын кесіп өтетін Арыс өзенінен суға батып бара жатқан қыз туралы хабарлама Отырар аудандық полиция бөлімінің кезекшілігіне таңғы сағат 6-лар шамасында түседі. Хабарлама түскен кезде полицейлер жақын маңдағы патрульдік полиция қызметкерлеріне хабар береді. Хабарды естіген Рақымжан Ниязбекұлы бірінші жетіп, ойланбастан суық суға секіреді. Бойжеткен ағысқа төтеп берер емес. Өзен өз еркіне көндіріп әкетпекші. Қыз да барынша жанталасуда.

Сол кезде Рақымжан бар күшімен қызға қарай жүзіп барады. Шошып қалған бойжеткен полицейдің иығына жабыса кетеді. Тереңге бойлаған сумен екеулеп күреседі. Ағын су екеуін жағаға жеткізер емес. Алланың қолдауы да болар, ақыры Рақымжанның қолы судың шетінде өсіп тұрған кәрі жыңғылдың бұтасына ілінеді. Тездетіп ұсталған бұтадан, ары қарай тартқылап, ақыры жуан жеріне жармасады. Осылайша жас қызметкердің өжеттілігінің арқасында екеуі де аман қалады. Сол маңға жеткен жедел жәрдем бірден қызды орталық емханаға жеткізіп, жан сақтау бөліміне жатқызады.

«Қыстың ызғары әлі де басыла қоймаған кез. Су суық. Өзен арнасына толып, ағысы да жоғары болатын. Қызды судың алып кетіп бара жатқанын көріп, есім шықты. Киім шешіп тұруға уақыт жоқ болды да, үстімдегі нысанды киіміммен бірге суға секіріп кеттім. Бар ойым бойжеткенді өзеннің еркіне бермеу. Алланың қолдауы шығар екеуміз де сумен жанталасып жүріп, жағаға әзер шықтық. Мен сумен арпалысып жүргенде жағада біраз адам жиналып қалыпты. Судан шыққанда олардың иығымнан қағып, айтып жатқан алғыстарын естісеңіз. Маған мүлде бейтаныс адамдар. Бірақ бірінен соң бірі жылы сөздерін айтып, жөнімді сұрауда. Кейбіреулері «Жарайсың жігіт!Бастысы адам аман! » дейді, қолымды қысып»  деп, басынан өткен сол бір сәтті тебіреніспен баяндаған полицей.

          Жалпы киелі облысымызда Рақымжаннан бөлек өзге де көптеген полицейлер күнделікті қауіпті қызметтерінде түрлі оқиғаларға тап болып, кейбірі қызмет бабында қаза болып жатады. Ал кейбірінің осы Рақымжан секілді еңбегі еленеді. Қызметтің қиын екендігін білсе де, ант берген полицейлер ешқашан қауіптен қашқан емес. Кез-келген адамның басына қауіп төнсе, көмектесе кетуге әзір! Рақымжанның  Мемлекеттік награданы иемденуі, бұл оның еңбегінің ерендігі. Отырар ауданында аға сержант дәрежесінде жүріп-ақ жас полицейдің жасаған бұл  ерлігі баршаға үлгі.

Тастай суға түсіп, болашағына балта шабылғалы тұрған қызды аман алып шығу кез-келгеннің қолынан келе бермейтін іс!

            Бүгінде құтқарылған бойжеткен аман-есен өз отбасымен бірге. Рақымжанмен хабарласып, хал жағдайын сұрап тұрады. Ал біз болсақ, өрімдей жас қызды құтқарған батыр Рақымжанға толағай табыс тілеп, елдің шексіз алғысына бөлене бер демекпіз! Елдің атын шығаратын ерен ерліктерің көп болсын!