Бүгінгі күннің батырлары марапатталды

ҚР Президенті Жарлығымен өрт болған сәтте ерлігімен көзге түскен өрт сөндірушілер мен полицейлер марапатталды, деп хабарлайды Түркістан облыстық Полиция Департаментінің баспасөз қызметі.
Бүгін, облыс орталығы киелі Түркістан қаласына Қазақстан Республикасының Ішкі істер министрі полиция генерал-лейтенанты Ерлан Тұрғымбаев арнайы іссапармен келді. Министр өзінің бұл сапарымен ерлік жасаған бүгінгі күннің батырлары, яғни төтенше жағдай болған сәтте шарасыз қалған адамдарды аман алып қалған 6 қызметкерді ҚР Президенті Қ.Тоқаевтың 16 қыркүйек күнгі №153 Жарлығымен, «Ерлігі үшін» медалімен Түркістан облысы ТЖД қызметкерлері, яғни 4 өрт сөндіруші Бақдаулет Әлімқұлов, Құралбек Жұмабаев, Рүстем Сайдахметов, Бағлан Убайдиллаев мен Полиция департаментінің полицейі полиция майоры Қанат Рақышевқа табысталды.

Сонымен қатар, полиция подполковнигі Ермек Өсербаев пен полиция лейтенанты Қайрат Алекешевтер Ішкі істер министрінің бұйрығы бойынша «Өртте көрсеткен қайсарлығы үшін»медалдерімен марапатталды.
Өрт кезінде жедел қимылдап өздерінің қызметтік міндеттерін мінсіз орындаған қызметкерлерді құттықтаған ҚР ІІМ Е.Тұрғымбаев: «Біздің ішкі істер органы қатарында өзінің ерлігін көрсетіп, антына адал болып келе жатқан сіздер секілді қызметкерлер барда халықтың ұйқысы тыныш және қауіпсіз болатындығына сенімім мол»,- деді.
Одан әрі Министр Ерлан Тұрғымбаев Түркістан облысы ТЖД қызметкері азаматтық қорғау подполковнигі Бақытжан Абдуғаппаровтың үйіне барып, оған 2-ші дәрежелі «Айбын» орденін табыс етті.

Өрт сөндіруші өртті ауыздықтау кезінде ауыр жарақат алып, үйінде емделуде. Министр подполковник Б.Абдуғаппаровқа және оның отбасына өрт сөндіру және адамдарды құтқару кезінде көрсеткен батылдығы, батырлығы мен жанқиярлығы үшін алғысын айтты. Сондай-ақ тез арада сауығып кетуіне тілекші екендігін де жасырмады.

Бұрын Бақытжан Абдуғаппаров Арыс қаласында азаматтарды құтқару кезінде де өзінің қайсарлығымен ерекше көзге түскен болатын.
Еске сала кетейік, ағымдағы жылдың 10 қыркүйегінде Түркістан қаласындағы ірі қонақүйлердің бірі «Роял Гранд» отқа оранған болатын. Оқиға орнына келген облыстың ТЖД қызметкерлері мен полицейлер жақын маңдағы аумақты қоршауға алып, қонақ үйдің қонақтары мен қызметкерлерін дереу эвакуациялауға кіріскен болатын. Құтқару жұмыстарын жүргізу барысында 50 адам эвакуацияланды.
Сол сәтте, тәртіп сақшысы Қанат Ракишев өз өмірін қауіпке тігіп отқа оранған ғимараттан шыға алмай қалған Түркия елінің екі профессоры мен 4 жасар бүлдіршінді дін аман алып шыққан еді. Осындай ерлігімен көзге түскен батырымыз бүгінде Түркістан облысы Полиция департаментіне қарасты Патрульдік полиция батальонының қызметкері, Отанына деген адалдығымен қалтқысыз қызмет етуде.
Министр өзінің киелі мекендегі іссапарының соңында облыс орталығына келгеніне бір жыл уақыт болған Полиция департаментінің ғимаратын аралап, полицейлердің қым-қуыт жұмысымен де танысты.

Сондай-ақ, Ерлан Тұрғымбаев департамент жанынан ашылған халықтық-кеңсеге кіріп, полицейлердің жаңа форматқа көшіп халық алдындағы ашықтық пен мөлдірлігін көрсетіп, сол бағытта жүйелі жұмыстар атқарып жатқандығына ерекше мән берді.