Ұлытау — ұлт ұясы. Қазақ тарихындағы алтын әріппен жазылатын елеулі оқиғалар мен жаңғырумен жалғасқан қасиетті мекендер туристерін сұранып-ақ тұр. Жасампаз мемлекетіміздің бабалар мұрасын ұлықтау — ұрпақ парызы десек, әлі де ескере алмай жатқан тұстарымыз көп-ақ. Жақында Ұлытаудағы жалпыжұрттық форумға қатысқан ел Президенті Қасым-Жомарт Тоқаев — бұл мекеннің ішіне бүккен сырын жариялауды көө-өп айтты. Түсіне білген жан үшін қасиет қонып, бақ дарыған Арқа төсінің айтылмаған аңыз әңгімелері, жазылмаған шежірелері ауыз әдебиетімізді де, мәдениетімізді де жаңа сатыға көтермек. Тек әрекет керек.
«Қасиетті Қазақстанның» жетегімен «Айғақ» телеарнасы бұл дүйсенбіде әйгілі Жошы ханның кесенесіне барды. Жошы ханның — Шыңғыс ханның ұрпағы екендігі білеміз-ау. Дегенмен, бұл өлкені хан ұрпағымен не байланыстырады? Неге Жошы бұл мекенде жерленген? Осы сұрақтардың негізінде Жезқазған қаласынан 50 шақырым қашықтықта, Қарасеңгір өзенінің жағалауында орналасқан кесене туралы айтатын боламыз. Шын мәнінде де, Алтын орданың негізін қалаған Жошының күмбезіне тоқтамау, бұл аймаққа келген әрбір азаматқа сын болары анық.
Жошы ханның кесенесі XIV-XV ғасырларда салынған. 1 шақырым аумақты қамтитын кесене маңайында 24-ке жуық Алтын Орда дәуірінің бейіт қалдықтары бар. Сонымен қатар қорымға таяу жерлерден Жошы ордасының қираған үйінділерін көруге болады. Олар «Жошы Ордасы», «Орда базар» деп аталады.
Киелі мекендегі Жошы ханның күмбезін көргенде, ғибратқа толы тарих сахнасы көз алдыңнан сырғып өткендей сезімде боласың. Себебі мұнда ел тағдырын, өз тағдырынан биік қойған ұлы тұлғалар жерленген. Ендігі біздің ұлағатты ұрпақ ретіндегі парызымыз — олардың ерлік істерін мадақтап, мәңгі есте қалдыру.
